УИХ дахь МАН-ын бүлэг  өчигдрийн хуралдаанаар Монгол Улсын сайд М.Энхсайханаас Тавантолгойн гадаадын хөрөнгө оруулагчидтай хийх хэлэлцээрийн явцын талаар мэдээлэл сонсчээ.

Бүлгийн дарга С.Бямбацогт энэ талаар хэлэхдээ “Тавантолгойн асуудлаар өмнөх Засгийн газрууд удаа дараа яригдаж хэлэлцээ хийгдсэн боловч зогсцгоосон. 2008-2012 оны  хамтарсан Засгийн газрын үед “Эх орны хишиг”, “Эрдэнийн” хувь гэж ард иргэдэдээ Хүний хөгжлийн сангаас 1,5 сая төгрөг бэлэн мөнгөөр болон хувьцаа хэлбэрээр олгохоор болсон.

Үүнээс тодорхой хэмжээний  иргэд 1072 хувьцааг эзэмшихээр болж Хүний хөгжил сангийн дэвтэрт бичигдсэн. Гэхдээ үнэндээ  өнөөдрийг хүртэл 1072 хувьцаа үхмэл хөрөнгө байдалтайгаар байна. Тийм учраас энэ удаагийн Засгийн газраас оруулж байгаа Тавантолгойн орд газарт эхний ээлжинд ард иргэддээ өгөөжтэй байх асуудлыг яръя.

Дараагийн ээлжинд үндэсний компаниудаа дэмжих бодлого барих ёстой. Монголын төрд ямар өгөөжтэй байх ёстой юм бэ асуудлыг анхаарч ажлын хэсэг байгуулан ажиллана.

УИХ-ын гишүүн Я.Содбаатар ажлын хэсэг байгуулна. Эхний ээлжинд 1072 хувьцааг амилуулах, ард иргэдээ өмчтэй болгох, өмчөөсөө үр ашгаа хүртэх боломжийг бүрдүүлэх шаардлагыг хөрөнгө оруулагч компаниудад тавих ёстой гэсэн зарчмын байр суурь баримтална.

Энэ талаар Монгол Улсын Ерөнхий сайдад албан бичиг явуулж, парламентын хяналтын дор, УИХ-аас зөвшөөрөл авч, ард иргэддээ нээлттэй явуулахыг шаардана. Засгийн газар нэлээд богино хугацаанд шийдчих гээд байгаа учраас манай бүлэг нэлээд нухацтай хандана” гэсэн байр суурийг илэрхийллээ.