УИХ дахь МАН-ын бүлгийнхэн Засгийн газарт хамтраж ажиллах эсэхээ намын бага хурлаараа хэлэлцэн шийдэхээ мэдэгдсэн.

Баасан гаригт хуралдахаар товлосон бага хурал тодорхойгүй шалтгаанаар хойшлогдсон хэмээн МАН-ын Ерөнхий нарийн бичгийн дарга Ж.Мөнхбат мэдэгдсэн билээ.

Тэгвэл сөрөг хүчнийхэн өнөөдөр 13.00 цагт намын байрандаа бага хурлаа хийхээр зарлажээ.

Өчигдөр УИХ дахь АН, МАН-ын Ажлын хэсгийн зөвшилцөх уулзалт болж, улс орны өмнө тулгамдсан асуудлыг хэрхэн шийдвэрлэх талаар зөвшилцөлд хүрсэн байна. МАН-ынхан Засгийн газрын бүрэлдэхүүнд орох эсэх нь өнөөдөр тодорхой болно.

МАН-ын дарга М.Энхболд илтгэлээ тавьж дууссан бөгөөд бага хурлын гишүүд асуулт, хариултын хэсэгтээ орж байна.

МАН-ын төлөөллийн төв байгууллага нь Бага хурал бөгөөд 310 гишүүний бүрэлдэхүүнтэй. Бага хурлын гишүүдийг Монгол Улсын Их хурал, Засгийн газрын гишүүн, аймаг, нийслэлийн ИТХ-ын дарга, Засаг дарга, аймаг, нийслэл, дүүргийн намын хорооны дарга, орон тооны дэд даргаар сонгогдож томилогдсон гишүүдийг оролцуулан аймаг, нийслэл, дүүргийн намын хорооны саналыг харгалзан нэр дэвшүүлж саналыг нууцаар хураан олонхийн саналаар томилдог. Энэ удаа МАН-ын бага хурал намын дүрмийн 20.3.4-т зааснаар “Эвсэл”-ийн Засгийн газар байгуулах шаардлага гарвал энэ тухай хэлэлцэж шийдвэр гаргах тухай үндэслэлээр хуралдаж байгаа юм.

Бага хуралдаа Америкт амьдрах болсоор хоёр жил буй гэх намын лидерүүдийн нэг С.Баяр, УИХ-ын гишүүнээс татгалзсан У.Хүрэлсүх нарын “сураг тасраад” байсан хүмүүс оролцож байна.

Ерөнхий сайд асан С.Баяр АН-тай хамтран ажиллах саналыг дэмжиж үг хэлсэн байна.
 

 Бага хурлын эхэнд МАН-ын дарга, УИХ-ын дэд дарга М.Энхболд улс төрийн илтгэл тавьж хэлэлцүүллээ.

Дөрвөн бүлэг бүхий уг илтгэлд улс орны улс төр, нийгэм, эдийн засгийн байдал ямар байгаа талаар онцолж, XXVII Их хурлаас хойш намаас авч хэрэгжүүлсэн ажил, цаашдын зорилт, УИХ дахь МАН-ын бүлгийн үйл ажиллагааны талаар танилцуулав.

Мөн тэрбээр Ерөнхий сайд Ч.Сайханбилэгээс ирүүлсэн засагт хамтран ажиллах санал, ажлын хэсгүүдийн зөвшилцөл, судалгааны байгууллага, мэргэжлийн хүмүүс, орон нутгийн намын хороод, ард иргэдийн саналыг багцлан Бага хурлын гишүүдэд мэдээлсэн юм.

МАН-ынхан бага хурлаараа Засгийн газарт хамтран ажиллах, эсэх тухай асуудлыг шийдвэрлэлээ. УИХ дахь сөрөг хүчинд төрийн эрх барьж буй АН-ынхан Засгийн газарт хамтран ажиллахаар зөвшилцөх уулзалтыг хэд хэдэн удаа зохион байгуулсан.

Ерөнхий сайд Ч.Сайханбилэг мөн хамтран шинэ засаг байгуулах албан бичиг илгээсэн ч хариуг Бага хурлаар хэлэлцсэний дараа өгөхөөр болж хүлээлгээд байгаа. Энэ хурлаар шийд нь гарах шиг боллоо.

МАН-ын Бага хурлаар энэ асуудлыг хэлэлцэж, улс орны өмнө тулгамдсан асуудлыг шийдвэрлэхийн тулд эрх баригчидтай хамтран ажиллах нь зүйтэй гэж үзсэн байна.

Бага хурлын гишүүд байр сууриа илэрхийлсний дараа санал хураалт явуулахад гишүүдийн олонх нь Засгийн газарт хамтран ажиллахыг дэмжжээ.