“Монгол бичгийн хэрэглээг нэмэгдүүлье” уриан дор 2012 оны Үндэсний бичиг үсгийн баярыг дөрөвдүгээр сарын 26-наас эхлэн тавдугаар сарын 10-н хүртэл БСШУЯ, ЗГХА, Соёл, урлагийн хороо, Үндэсний номын сан зэрэг байгууллагууд зохион явуулах гэж байна.

Зохион байгуулагчдын зүгээс монгол бичгийн хэрэглээг нэмэгдүүлэхэд хамгийн үр нөлөөтэй хэлбэр нь бүх нийтийг хамарсан олимпиад уралдаан тэмцээн гэж үзэж байгаа тул тус баярын хүрээнд  “Анхан шатны сургуулийн багш нар,их дээд сургуулийн оюутнуудын дунд зохиогдох монгол бичгийн олимпиад”, “Монгол бичгийн тэргүүний уншигч” шалгаруулах улсын уралдаан, “Төрийн албан хаагчдын монгол бичгийн олимпиад”,”Мэргэжлийн болоод мэргэжлийн бус сургуулиудын оюутнуудын дунд зохиогдох монгол бичгийн олимпиад”,”Нийслэлийн мэргэжлийн багш нарын дунд зохиогдох монгол бичгийн олимпиад“,”Монгол бичгийн улсын олимпиад” тус тус зохион байгуулахаар төлөвлөжээ.

Дээрх олимпиад уралдаан нь хот хөдөөгийн бүх оролцогчдыг хамрах бөгөөд сүүлчийн шалгаруулалт нь нийслэлд  болох гэнэ.

Мөн Үндэсний бичиг үсгийн баяраар Үндэсний номын сан дээр“Монгол бичгийн албан хэрэглээг нэмэгдүүлье” сэдэвт эрдэм шинжилгээний хурал, “Жадамба буюу найман мянгат их хөлгөн судрын цоморлог” тэргүүт ховор үнэт номуудын үзэсгэлэн, “Монгол бичиг - Монголын бахархал”бичиг үсгийн үзэсгэлэн тус тус зохион байгуулж “Монгол бичгээ эрхэмлэгч” хувь хүн,төрийн болон төрийн бус байгууллага, 2012 оны шилдэг номын эздэд өргөмжлөл гардуулна.

Үндэсний бичиг үсгийн баярын өдрүүдэд зохиогдох үйл ажиллагааны хөтөлбөр



А.Цацрал