Төрийн ордны хашааны зүүн талын явган замыг бүрэн хааснаас болж иргэд авто замаар алхах боллоо хэмээн нийгмийн сүлжээгээр шүүмжлэх болсон. Тэгвэл энэ замыг өчигдөр орой нээсэн бөгөөд ингэхдээ хоёр хүн зөрөхөөргүй нарийхан замтай байгааг доорх зургуудаас харах боломжтой юм.

Энэ замыг хааж гуравдугаар сарын 25, 26-ны амралтын өдөр хашаа барьжээ. Ордны хашааг засварлах зорилгоор уг хашааг барьсан байна.

Ордны хашааны талаар Төр засгийн үйлчилгээ эрхлэх газрын Барилгын инженер, техникийн хэлтсийн дарга Т.Болдбаатар "Хашааг засварлаад хуучин суурин дээр нь барих юм. Иргэдийн алхдаг явган зам нь Улаанбаатар хотын өмч тул уг замыг огт хашаалахгүй. Хашааны засварын ажлыг дөрөвдүгээр сарын 19-ний өдөр нээхээр төлөвлөн ажиллаж байна. Төмөр хашааны шонг гүн суулгаагүй учир хүнд жинтэй төмөр хашаа иргэдийн эсэргүүцэл, жагсаал цуглааны үед ганхсан. Тиймээс засвар шинэчлэл хийх шаардлага үүссэн"  хэмээн ярьсан байна.

Гэрэл зураг: Г.Өнөболд