УИХ-ын чуулганы нэгдсэн хуралдаан эхэллээ.

Энэ долоо хоногт дараах асуудлыг хэлэлцэхээр товлосон. Үүнд,

• Дархлаажуулалтын тухай хуульд нэмэлт оруулах тухай хуулийн төсөл /Засгийн газар 2023.06.28-ны өдөр өргөн мэдүүлсэн, эцэслэн батлах/
• Газрын тухай хуульд нэмэлт, өөрчлөлт оруулах тухай хуулийн төсөл /Засгийн газар 2023.09.29-ний өдөр Монгол Улсын 2024 оны төсвийн тухай хуулийн төсөлтэй хамт өргөн мэдүүлсэн, хэлэлцэх эсэх, үргэлжилнэ/
• Тусгай хяналтын дэд хорооны бүрэлдэхүүнд өөрчлөлт оруулах тухай асуудал
• Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл /Засгийн газар 2023.10.20-ны өдөр өргөн мэдүүлсэн, хэлэлцэх эсэх/
• Иргэний хэрэг шүүхэд хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл /Засгийн газар 2023.10.20-ны өдөр өргөн мэдүүлсэн, хэлэлцэх эсэх/
• “Төрөөс мөнгөний бодлогын талаар 2024 онд баримтлах үндсэн чиглэл батлах тухай” Улсын Их Хурлын тогтоолын төсөл /Монголбанк 2023.09.25-ны өдөр ирүүлсэн, анхны хэлэлцүүлэг/
• Бусад
• Монгол Улсын Их Хурлын гишүүн Б.Баттөмөрөөс Монгол Улсын Ерөнхий сайдад хандаж “Ирээдүйн өв сангийн тухай хуулийн хэрэгжилтийн талаар” тавьсан асуулгын хариуг сонсох.

Чуулганы нэгдсэн хуралдаанд 47 гишүүн оролцож байгаа бөгөөд 42 гишүүн дэмжсэнээр Дархлаажуулалтын тухай хуульд нэмэлт өөрчлөлт оруулах хуулийн төслийг эцэслэн баталлаа.

Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцэх эсэхийг хэлэлцэж байна. Хууль санаачлагчийн танилцуулгыг ХЗДХ-ийн сайд Б.Энхбаяр танилцуулж байна.

"Хуулийн төсөл батлагдсанаар хуулийг хэрэгжүүлэхэд тулгарч байсан хүндрэл бэрхшээл арилж, Монгол Улсын Үндсэн хуульд заасан халдашгүй, чөлөөтэй байх үндсэн эрх улам бүр баталгаажиж, Монгол Улсын нэгдэн орсон олон улсын гэрээ, конвенцид нийцэх бөгөөд мөрдөн шалгах ажиллагааны явцад хүний эрхийн зөрчил гарахаас урьдчилсан сэргийлэх эрх зүйн орчин боловсронгуй болсноор хүний эрх чөлөөг хангах, зөрчигдсөн эрхийг нөхөн сэргээн эдлүүлэх ажлын үр дүн дээшилнэ. Монгол Улсын Үндсэн хуульд заасан “хууль зүйн туслалцаа авах” эрх улам бүр баталгаажна" хэмээн төслийн үндэслэлд дурджээ.

ХЗДХ-ийн сайд Б.Энхбаяр мэдээлэлдээ хуулийн төслийг баталснаар иргэний хэргийг шийдвэрлэх хугацаа багасан боломжтойг ч хэлсэн юм.

УИХ-ын гишүүд хуулийн төсөлтэй холбоотой асуулт асууж үг хэлж байна.

УИХ-ын гишүүн С.Одонтуяа: Гэр бүлийн дагнасан шүүх байгуулна гэж ярьж байна. Хүүхэдтэй ажилладаг байцаагчтай болно гэж байгаа дэвшилтэт зүйлс сонсогдож байна. Тэгвэл гэр бүл салсны дараа олгох тэтгэмж төлөлтийн хувь бага байгаатай холбоотойгоор энэ төрлийн маргаан хуулийн төсөлд хамаарах уу.

Ажлын хэсэг: Бага үнийн дүнтэй маргааныг хялбар, шуурхай явуулах зорилгоор хуулийн төслийг боловсруулсан. 75.1-д зургаан төрлийн нэхэмжлэлийн шаардлагыг оруулсан бөгөөд үүнд хамаарахгүй. Тусдаа буюу ердийн журмаар шийдвэрлэх хэрэг байгаа юм. Хуулийн төслөөр шүүхэд хэрэг хянан шийдвэрлэх ажиллагаатай холбоотой бөгөөд шийдвэр гүйцэтгэх ажлууд хамаарахгүй.

ХЗДХ-ийн сайд Б.Энхбаяр: Гэр бүлийн шүүх, хүүхдийн тэтгэмж төлөх харилцаатай холбоотой асуудлыг Гэр бүлийн тухай хуулийн төсөлд оруулсан. Ирэх 7 хоногийн Засгийн газрын хуралдаанаар хэлэлцэж, хоёр долоо хоногийн дараа УИХ-ын чуулганаар хэлэлцэнэ. Хүүхдийн тэтгэмж төлөлт 60 хувьтай байна гэж би сонссон. Жилийн өмнө 50 хувь байсан, нэмэгдэж  л байгаа юм билээ. Гол нэмэгдсэн шалтгаан нь тэтгэмжээ өгөхгүй байгаа этгээдийг гадаад зорчих эрхийг хязгаарласантай холбоотой гэсэн мэдээлэл өгсөн.