Олон улсын оддын тоглолт ямар байдаг бол? Тэгээд бас тэд Монголд ирж тоглолт хийх нь ямар санагдаж, бидэнд ямар уур амьсгал төрүүлэх бол гэсэн бодолтойгоор “Your Valentine” тоглолтыг зорилоо.

Өчигдөр буюу энэ сарын 17-нд “F4” киногоор олонд танигдсан дуучин Ким Хён Жун болон реппер MC Sniper, Bloo нар  “Буянт-Ухаа” спорт цогцолборт Монгол хамтлаг дуучидтай хамтран “Your Valentine” тоглолтоо толилуулаа.

19:00 цаг. Буянт Ухаа цогцолборт залуучууд цуглаж, заал дүүрчээ. Тоглолтын эхэнд DJ сэт тоглогдож, бүжигчид бүжиглэж, түүний араас Магнет Брайн дуучин дуулав. Тэр содон имидж, хоолойн цар хүрээгээрээ үзэгчдийг байлдан дагуулж тоглолтыг амжилттай нээж чадлаа.

Тайзны засалт, гэрэл, дуучид амьд хөгжим гээд бүгд маш гоё зохицжээ. Уг тоглолтод Монгол хамтлаг дуучид хамтран оролцсон. Тэд хэн гэдгээ, ямар дуучид гэдгээ харуулах шиг л дуугаа дуулж, үзэгчдийг доргиож чадсан юм.

20:00 цаг. Дуучин, реппер Bloo гарч ирлээ. Солонгос дуучдын тоглолтыг үзэхээр олон улсаас шүтэн бишрэгчид нь зорин ирсэн харагдав. Бидэнд Downtown дуугаараа алдаршсан түүний үглэлт, дуу сэтгэл гонсойлгосонгүй.

Удалгүй Ким Хён Жун дуучин гарч ирснээр тоглолтын оргил үе халуухан болж эхлэв. Тэрээр "Монголд дахин ирж бие даасан тоглолтоо хийх ёстойгоо ойлголоо. Монгол фенүүддээ маш их талархаж байна. Энэ удаагийн тоглолтыг  хэзээ ч мартахгүй, сэтгэл зүрхэндээ үүрд санах болно" гэсэн юм.

Эцэст нь тус тоглолтын зохион байгуулалт, шинэ үеийн залуучуудын соёлтой байдал, дуучдын хоолойн цар хүрээ гээд онцгой нэгэн үдэш болж өндөрлөлөө.

Тоглолтын зургуудаас хүргэж байна.

Гэрэл зургуудыг: Т.Бархас