Энэ долоо хоногт болж өнгөрсөн зарим онцлох үйл явдлаас тоймлон хүргэе.

2,9 сая толгой мал хорогдоод байна

2023 оны арваннэгдүгээр сараас хойш орсон цас 9.6 мм буюу олон жилийн дунджаас 1.6 дахин их буюу сүүлийн 50 жил ажиглагдаагүй их цас уналаа. 2009-2010 оны зуд болсон. Тухайн үед олон жилийн дунджаас 1.4 дахин их хур тунадас орсон бол энэ өвөл олон жилийн дунджаас 1.6 дахин их хур тунадас орлоо гэж Урьдчилан мэдээлэх хэлтсийн дарга Л.Оюунжаргал тайлбарлав.

Өнөөдрийн байдлаар /02.24/ нийт нутгийн 80,6 хувь нь зудын нөхцөл байдалтай, үүнээс 21,8 хувь нь төмөр зуд, 25,9 хувь нь цагаан зудархуу нөхцөл байдалтай байгаа ба 2,9 сая мал хоргодоод байна. 

Цас, зудын нөхцөл байдлаас шалтгаалан улсын хэмжээнд нийт 13.5 мянган айл цасанд боогдож, 38.4 мянган км зам харгуй хаагдсан.

Сайд нараар ахлуулсан 6 ажлын хэсэг орон нутагт ажиллаж, төрийн цэргийн болон хууль сахиулах байгууллагын 250 орчим алба хаагч, 120 гаруй тусгай зориулалтын техник хэрэгсэлтэйгээр энэ сарын 19-23-ны өдрүүдэд 16 аймгийн 44 сумын 1966 өрхөд 1528 тонн малын өвс, тэжээлийн хүргэлт хийж, 10.009 км хаагдсан замыг нээх ажлыг зохион байгууллаа. Цасны зузаан, зам, давааны нөхцөл байдлаас шалтгаалан 30 км замыг гаргахад 4-6 цагийг зарцуулж байна.

 Монголын уран нугараач Гиннесийн амжилт тогтоолоо

Дэлхийд алдартай Олон улсын “Нарны цирк”-ийн /Cirque du Soleil/ жүжигчин, Монгол Улсын уран нугараач С.Оюун-Эрдэнэ 30 секундийн хугацаанд уран нугаралтын суниалтыг тусгай шалгуурын дагуу хамгийн олон удаа буюу 28 удаа гүйцэтгэснээс 24-ийг тооцсоноор Гиннесийн дээд амжилтыг шинэчлэн тогтоолоо.

Жүжигчин С.Оюун-Эрдэнэ 6 настайгаасаа уран нугаралтаар хичээллэж олон улсын “Нарны цирк”-т 20 гаруй жил ажиллаж байгаа бөгөөд түүнтэй хамт тус циркийн акробатчин Люси (Lucie) гар дээрээ хойшоо хамгийн олон үсэрсэн (back handsprings) үзүүлбэрийг гүйцэтгэж Гиннесийн дээд амжилтыг шинэчилсэн байна.

22 настай Хокүсэйхо зодог тайлахаар болж, Хакүхогийн зэргийг бууруулав

Сүмогийн дээд зиндаанд барилддаг Хокүсэйхо А.Даваанинж болон түүний багш Хакүхо М.Даваажаргал нар шийтгүүлэх болсон талаар бид өмнө мэдээлсэн.

Тэгвэл Японы сүмо бөхийн холбоо (JSA) өнөөдөр хуралдаж хэд хэдэн шийдвэр гаргасан дунд Хокүсэйхогоос ирүүлсэн зодог тайлах хүсэлтийг зөвшөөрсөн гэж Kyodo мэдээллээ.

Хокүсэйхо нь доод зиндааны залуу бөхчүүдэд бие махбодын хүчирхийлэл үйлдсэн буюу дэглэсэн, зодсон хэргээр байцаагдсан бөгөөд зодог тайлах хүсэлт гаргаагүй байсан ч JSA зодог тайлахыг санал болгох байсан гэв.

---

“Парис-2024” паралимпын эрх олгох тэмцээнээс манай тамирчид мөнгөн медаль хүртлээ

Ираны нийслэл Тегран хотод “Парис-2024” зуны паралимп наадмын эрхийн оноо олгох "World President's Cup" олон улсын тэмцээн хоёрдугаар сарын 17-21-нд болов.

VI удаагийн тэмцээнд манай улсаас Үндэсний шигшээ дасгалжуулагч Н.Эрдэнэбаатар, Д.Батнасан нарын удирдлага дор таван тамирчин тулалдсанаас

• эрэгтэйчүүдийн 63 кг-ын жинд ДАШТ-ий таван удаагийн аварга, Азийн АШТ-ий таван алтан медальт, Азийн наадмын аварга, гавьяат тамирчин Г.Болор-Эрдэнэ мөнгө,
• эмэгтэйчүүдийн 52 кг-ын жинд ДАШТ-ий хүрэл медальт, “Ханжоу-2022” Азийн зуны спортын наадмын мөнгөн медальт У.Сүрэнжав мөнгөн медаль хүртлээ.

---

Нийслэлийн Засаг даргын зөвлөхөөр М.Найданхүү, Ж.Энхжаргалан нарыг томиллоо

Нийслэлийн Засаг даргын Шинжлэх ухаан, технологи, инновац хариуцсан зөвлөхөөр Мижигдоржийн Найданхүүг, Нийгмийн хөгжил, бүтээн байгуулалтын бодлого хариуцсан зөвлөхөөр Жадамбын Энхжаргаланг томиллоо. Тэдний ажилласан туршлага, намтрыг ЭНД дарж хүлээн авна уу.

Гэр бүлийн гишүүн бүрд зориулсан “Wonderland” фестиваль болж байна

Мобиком группын зохион байгуулж буй гэр бүлийн гишүүн бүрд зориулсан хамгийн том WONDERLAND фестиваль энэ амралтын өдрүүдэд Steppe Arena-д болж байна. Та хүүхдүүдээ дагуулан WONDERLAND фестиваль дээр зочилж театр, циркийн үзүүлбэр, хамтлаг дуучдын тоглолтыг үзэн, дуртай youtuber-үүдтэй нь уулзуулах боломжтой. Дэлгэрэнгүйг ЭНД дарж хүлээн авна уу.