Зам тээврийн ослоор хүүхэд нас барсан хэрэг гарчээ. Тодруулбал, цагдаагийн байгууллагад өчигдөр буюу энэ сарын 21-ний өдрийн 12:41 цагт Сонгинохайрхан дүүргийн 33 дугаар хороо, Тахилтын 4 дүгээр буудлын орчимд автомашинтай хүн хоёр хүүхэд дайрчихлаа гэх дуудлага иржээ.

Тээврийн цагдаагийн албаны Мөрдөн шалгах газраас шалгахад 12-13 насны 2 хүүхдийг гарцаар зам хөндлөн гарах үед Тоёота Приус маркийн тээврийн хэрэгслийн жолооч мөргөсөн. Улмаар 12 настай Н ослын газарт амиа алдаж,  13 настай Х гэмтэн ГССҮТ-д эмчлүүлж байгаа хэрэгт мөрдөн шалгах ажиллагаа явуулж байна. Жолооч согтууруулах ундаа хэрэглээгүй байсан аж.

Явган хүний зохицуулдаггүй гарц руу ойртон ирсэн жолооч хурдаа хасаж, уг гарцаар гарч байгаа болон гарахаар завдаж байгаа явган зорчигчид зогсож зам тавьж өгнө.

Нийслэлийн хэмжээнд хичээлийн шинэ жил эхэлснээс хойш буюу 2023 оны есдүгээр сарын 01-21-нийг  хүртэлх хугацаанд нийт 38 хүүхэд зам тээврийн осолд өртжээ. Үүнд явган зорчигчоор 26 хүүхэд, зорчигчоор 4 хүүхэд, насанд хүрээгүй тээврийн хэрэгсэл жолоодсон 4 хүүхэд, унадаг дугуйтай 4 хүүхэд гэмтсэн бол нэг хүүхэд амь насаа алджээ.

Зам тээврийн осол, хэргээс урьдчилан сэргийлж жолооч нар архи, согтууруулах ундаа хэрэглэсэн үедээ тээврийн хэрэгсэл жолоодохгүй байх, жолоодох эрхийн үнэмлэхгүй болон насанд хүрээгүй хүнд жолоогоо шилжүүлэхгүй байх, сургуулийн орчинд болон явган гарцтай замын хэсэгт анхаарал, болгоомжтой хөдөлгөөнд оролцож зам, тээврийн осол хэргээс урьдчилан сэргийлэхийг цагдаагийн байгууллагаас зөвлөж байна.

Монгол Улсын Замын хөдөлгөөний дүрэмд “Явган хүний зохицуулдаггүй гарц руу ойртон ирсэн жолооч хурдаа хасаж, уг гарцаар гарч байгаа болон гарахаар завдаж байгаа явган зорчигчид зогсож зам тавьж өгнө” гэж заасан байдаг.

Эх сурвалж: ЦЕГ