Монгол Улсад орчин цагийн дипломат алба үүссэний 110 жилийн ойд зориулан бүтээсэн “Монгол Улсын гадаад харилцаа” он цагийн товчоон номын нээлт өчигдөр Гадаад харилцааны яаманд боллоо.

“Монгол Улсын гадаад харилцаа” он цагийн товчоон ном нь 1911-2021 он хүртэлх 110 жилийн түүхэн үйл явдлыг багтааж, Монгол төрийн алтан аргамж болсон гадаад бодлогын үндэс, түүхэн хөгжлийн үе шатыг хураангуйлан бичиж, нэн чухал зарим зураг, баримтуудыг оруулсан бүтээл юм.

Тус арга хэмжээнд Монгол Улсад байнга оршин суугаа гадаад улсын дипломат төлөөлөгчийн газрын тэргүүн нар, НҮБ, түүний төрөлжсөн болон олон улсын байгууллагын суурийн төлөөлөгчид, Монгол Улсаас хилийн чанадад шинээр томилогдсон Элчин сайд нар тэргүүтэй 80 гаруй зочин төлөөлөгчид оролцов.