ХБНГУ-ын экстрим спортын тамирчин Гиидо Кунзе энэ оны наймдугаар сарын эхээр Монгол орны баруун хязгаараас зүүн хил хүртэл дугуйгаар туулж, Гиннесийн дээд амжилтыг шинээр тогтоохоор төлөвлөж байгаа талаар бид өмнө нь мэдээлж байсан.

Тэгвэл тус тамирчин Монголд хүрэлцэн ирээд байгаа бөгөөд аяллын талаар мэдээлэл өгч байна.

ХБНГУ-ын экстрим спортын тамирчин Гиидо Кунзе: Тус аяллыг бид жилийн өмнөөс төлөвлөж эхэлсэн. Анх бүтэхгүй санаа мэт санагдаж байсан ч гэр бүл, найзуудын тусламжтайгаар өнөөдөр бид энд сууж байна. Энэ аялалаараа Монгол орныг дугуйгаар аялах боломжтой гэдгийг экстрим аялагч нарт харуулмаар байна. Аялалын явцад бид нар баримтат кино бүтээнэ. Мөн би Монгол орны баруун хязгаараас зүүн хил хүртэл дугуйгаар туулж, Гиннесийн дээд амжилтыг шинээр тогтоохоор төлөвлөж байгаа.

Хэрэв би Гиннесийн дээд амжилт тогтоож чадвал миний амжилтыг эвдэх гэсэн бусад аялагчдыг Монгол руу татаж, Монголын аялал жуулчлалын салбарт өөрийн гэсэн хувь нэмрээ оруулна гэдэгт итгэлтэй байна. Би бол мэргэжлийн тамирчин хүн биш. Энэ аялалд бэлдэхийн тулд тусгай бэлтгэл сургуулилт хийгээгүй. Ажлаа тараад бэлтгэл сургуулилтаа хийдэг байсан. Маргааш Герман, Монголын хамтарсан багийн аялал эхэлнэ. Аяллын явцад надад тусалж дэмжинэ гэсэн хүмүүс зөндөө байгаа бөгөөд энэ бүх хүмүүст талархсанаа илэрхийлмээр байна.