Европын комиссын тогтоолын дагуу аравдугаар сарын 11-нээс нэвтэрсэн Визийн мэдээллийн системийг Шенгений орнуудаас Монгол Улсад суугаа Дипломат төлөөлөгчийн газрууд аравдугаар сарын 12-ны өдрөөс эхлэн нэвтрүүлэхээр боллоо.

Виз мэдүүлэгч нь анх удаа Шенгений виз мэдүүлж буй тохиолдолд өчигдрөөс эхлэн биечлэн ирж биометрийн мэдээлэл (хурууны хээ болон гэрэл зураг)-ийг өгч виз мэдүүлэхээр болжээ.

Төр, засгийн газрын тэргүүн нар болон албан ёсны айлчлалын бүрэлдэхүүнд багтсан төлөөлөгчид, 12-оос доош насны хүүхэд, биеэр ирэх боломжгүй хөгжлийн бэрхшээлтэй иргэд дээрх шаардлагаас чөлөөлөгдөнө.

Энэхүү систем нэвтэрснээр Шенгений орнууд виз мэдүүлэгчийн мэдээллийг харилцан солилцох, виз олгохтой холбоотой үйл явцыг хялбарчлах, хилийн хяналт, шалгалтыг хөнгөвчлөх, виз мэдүүлэгчийн мэдээллийн нууцлал, аюулгүй байдлыг сайжруулах зэрэг давуу талууд бий болох юм.

Визийн мэдээллийн систем (ВМС)-ийн тухай дэлгэрэнгүй мэдээллийг Европын комиссын “http://ec.europa.eu/dgs/home-affars/what-we-do/policies/borders-and-visas/index_en.htm”  цахим хуудаснаас үзэж танилцана уу.