Монгол Улсад Батлан хамгаалах салбар үүсч байгуулагдсаны түүхт 100 жилийн ой энэ онд тохиож буй.

Ойн баярын арга хэмжээний хүрээнд өнөөдөр “Монгол цэргийн наадам” арга хэмжээг Хүй долоон худагт зохион байгуулж байна. Наадмын үеэр Монголын эртний дайчдаас эхлээд орчин үеийн цэргийн хувцас хэрэглэлийн үүх түүхийг дэлгэн харууллаа.

Тус наадамд гадны хамтран ажиллагч төлөөлөгчид уригдсан бөгөөд ОХУ, БНХАУ, АНУ, ХБНГУ, БНЭУ, БНСУ, Украйн, Швейцарын холбооны улсын төлөөлөгчид наадмыг үзэж сонирхож байна. Монгол цэргийн наадамд оролцохоор  Бүгд Найрамдах Энэтхэг Улсын Армийн жанжин штабын дарга, генерал Вижай Кумар Сингх тэргүүтэй төлөөлөгчид манай улсад хүрэлцэн ирсэн юм. Энэтхэгийн арми 2.1 сая цэрэгтэй бөгөөд дэлхийн дөрвөн том армийн нэгд тооцогддог.

Жанжин штаб дотор гурван мотоциклчдын арми байдаг аж. Түүний нэг болох "Shwet ashw" буюу "Цагаан морь" армийн 30 мотоциклтой 42 цэрэг манай улсад ирсэн билээ. Тэд өнөөдөр “Монгол цэргийн наадам”-д шүхрээр буулт хийж, мотоциклтой үзүүлбэрээ сонирхуулсан юм. Тус арми нь 1995 онд 11 мотоцикл дээр 152 хүн багтаасан амжилтаараа “Гиннес"-ийн номд орсон байна.

Монгол Улсад Батлан хамгаалах салбар үүсч байгуулагдсаны түүхт 100 жилийн ойн хүрээнд ирэх арваннэгдүгээр сард олон улсын эрдэм шинжилгээний хурал хийж, манай улсын БХЯ түүх, ирээдүйн ажиллагааны бодлогын талаар зөвлөлдөх болсон гэх мэт олон арга хэмжээ байгаа юм байна.  

Мөн тус ойн хүрээнд, “Монгол Улсын БХЯ-ны түүх”, “Монгол Улсын БХ-ын сайдууд”, “Баримт бичгийн эмхэтгэл” гэсэн гурван үндсэн боть ном гаргаж байгаа аж.

Монгол цэргийн наадмын ажиллагаа өнөөдөр 22:00 цагт дуусах юм.

Б.Хэрлэн