Өнөөдөр, НҮБ-ын Хөгжлийн хөтөлбөр “Эрдэс баялгийн салбарт шударга байдлыг бэхжүүлэх Интегра” санаачилга болон “Хүний хөгжлийн төлөөх оролцооны арга замуудыг сайжруулах Оролцоо” төслүүдийг хэрэгжүүлнэ.  

Энэ хүрээнд зарласан тэтгэлэгт хөтөлбөрт шалгарсан 24 төслийг танилцуулав. Монгол Улсын хэмжээнд төрийн үйлчилгээний шударга, ил тод байдлыг нэмэгдүүлж, иргэдийн оролцоог хангахад чиглэсэн эдгээр төслүүдийг Люксембург, Дани, Бүгд Найрамдах Солонгос Улсын Засгийн газрын дэмжлэгээр НҮБХХ-ийн Санхүүжилтийн Цонх механизмаар дамжуулан хэрэгжүүлнэ. 

Интегра санаачилгын хүрээнд шалгарсан төслүүд нь эрдэс баялгийн салбарын үр ашиг, өгөөж, бүтээмжийг нэмэгдүүлэх, төрийн байгууллагын үйлчилгээг дэмжин, шударга байдлыг хангахад чиглэсэн шинэлэг шийдлүүдийг туршиж, хэрэгжүүлнэ.  

Харин Оролцоо төслийн хүрээнд шалгарсан төслүүд нь иргэний оролцооны хурдасгуур механизмуудыг туршиж, шийдвэр гаргах үйл явцад олон нийтийг оролцоог хангах бодлогын түвшний шинэчлэлүүдэд хувь нэмэр оруулах юм.  

Нээлтэд холбогдох яамд, агентлагууд, орон нутгийн засаг захиргаа, иргэний нийгмийн байгууллагууд, судалгаа, эрдэм шинжилгээний байгууллагууд, хэвлэл мэдээлэл, хөгжлийн түншүүдийн төлөөлөл оролцов.  
 
Төслүүдийн зорилго зорилт, хүлээгдэж буй үр дүн, цаашдын хэрэгжилтийн арга замуудыг хэлэлцлээ. “Төрийн үйлчилгээг төлөвлөх, шийдвэр гаргах үйл явцад иргэдийг оролцуулах нь төрийн байгууллагуудад итгэх иргэдийн итгэлийг бэхжүүлэх суурь юм. Энэхүү тэтгэлгүүд нь засаглал, нийгмийн шударга ёсыг сайжруулахад чиглэсэн, орон нутгийн дуу хоолой, санал санаачилгыг илүү хүчтэй болгоно” хэмээн Улсын Их Хурлын гишүүн Х.Баасанжаргал онцоллоо. 

Тэтгэлэгт хөтөлбөрт Монгол орны өнцөг булан бүрээс 90 гаруй төслийн санал ирүүлж, 24 төсөл шалгарчээ. Тэдгээр төсөлд нийт 200 гаруй мянган ам.долларын тэтгэлэг олгоно. Төслүүдийг ирэх сараас 2026 оны хоёрдугаар сар хүртэл хэрэгжих юм. 

Аж үйлдвэр, эрдэс баялгийн яамны Төрийн захиргаа удирдлагын газрын дарга Б.Дашпүрэв “Уул уурхайн салбарт ил тод, хариуцлагатай, тогтвортой шийдэлд хөрөнгө оруулах нь Монгол Улсын эдийн засгийн тогтвортой байдал, урт хугацааны хөгжилд чухал нөлөөтэй. Энэ нь байгалийн нөөцийн тогтвортой менежментийг сайжруулах бодит алхам юм” гэв.  

Эдгээр төслүүд нь залуус, эмэгтэйчүүд, орон нутгийн иргэд, эмзэг бүлгийн оролцоог нэмэх замаар нийгмийн бүх гишүүдийн эрх тэгш, хүртээмжтэй оролцоог хангана.  

Монгол дахь НҮБХХ-ийн Уур амьсгалын санхүүжилт, хөгжлийн эдийн засагч Фируз Сайдхаджаев “Нийгэмд бодит өөрчлөлт, ахиц дэвшлийг бий болгоход нягт түншлэл, хамтын хариуцлага шаардлагатай. Энэ тэтгэлгүүд нь орон нутгийн болон үндэсний оролцогчдын санаачилгуудыг дэмжиж, төр, иргэний нийгэм, эрдэм шинжилгээний байгууллагууд, хувийн хэвшил, орон нутгийн иргэдийн хамтын ажиллагааг бэхжүүлнэ.  
 
Хамтын ажиллагааны үр дүнд бид хүн бүрд хүртээлтэй, хариуцлагатай, тогтвортой тогтолцоог бэхжүүлж чадна” гэв. Нээлтийн дараа шалгарсан төслүүд оролцоо, шударга байдал, жендерийн чиглэлээр чадавх бэхжүүлэх сэдэвчилсэн сургалтад хамрагдлаа.