УИХ-ын чуулганы өнөөдрийн /2025.06.19/ үдээс өмнөх нэгдсэн хуралдаанаар Төрийн албаны зөвлөлийн гишүүнийг томилох, чөлөөлөх тухай асуудлыг хэлэлцэж байна. Төрийн албаны зөвлөлийн гурван гишүүний бүрэн эрхийн хугацаа дууссантай холбоотойгоор:

• Цэнддаваагийн Амартөгс
• Бадамдоржийн Төгсцэнгэл
• Лхагвасүрэнгийн Золзаяа нарыг нэр дэвшүүллээ. УИХ-ын гишүүд нэр дэвшигчдээс асуулт асууж, үг хэлж байна. 

УИХ-ын гишүүн Э.Болормаа, УИХ-ын сонгуулийн үеэр би нэг сурталчилгаа хийж, "тооно" гэдэг үгийг хэрэглэсэн. Тэр сурталчилгааны гол агуулга хэн танилтай нь л илүү эрх мэдэл, албан тушаалд хүрдэг. Энэ байдал ялангуяа Төрийн албаны зөвлөлд илүү хамаатай. Хэрэв та гурав ТАЗ-ийн гишүүнээр томилогдвол аливаа нэг даргын томилгоо биш, Монгол УИХ-аас томилогдсоноо ямагт санаж ажиллах ёстой. 

Энэ асуудал ялангуяа аймаг, орон нутагт хэрээс хэтэрсэн. Би Ховд аймгийн Засаг даргаар томилогдоод ажиллаж байхад ээж, аав эмээ өвөө нь ирээд “Миний хүүхдийг ажилд аваач” гэсэн хүсэлтийг сонсох бүрдээ залуу хүний хувьд их харамсдаг байсан.

Би гадаадад олон жил ажиллахдаа ямар ч хүн рүү ярилгүй, хэнийг ч гуйлгүй өөрийн анкетийг бариад ярилцлага, шалтгалтаа өгөөд НҮБ, Дэлхийн банк зэрэг олон улсын байгууллагад ажилласан. Ийм шударга нийгмийг л залуус хүсэж байгаа юм шүү. Энэ бүхэн та нарын яаж ажиллахаас эхэлнэ. Ямар нэг улс төрч та нар руу залгавал битгий утсаа аваарай гэж захив.