Бүгд Найрамдах Узбекистан Улсын Ерөнхийлөгч Шавкат Мирзиёев өнөөдөр /2025 оны 06 дугаар сарын 24-25-ны хооронд/ Монгол Улсад айлчилна. Түүний товч намтарыг хүргэж байна. 

Шавкат Миромонович Мирзиёев нь 1957 оны долоодугаар сарын 24-нд Узбекистаны Жиззах мужийн Заамин тойрогт төрсөн. Ташкентийн усжуулалт, механик инженерийн дээд сургуульд суралцаж, 1981 онд механик инженерийн мэргэжлээр төгссөн бөгөөд дараа нь техникийн ухааны докторын зэрэг хамгаалжээ. Сургуулиа төгссөний дараа тус сургуульд судлаач, багш, дэд профессор зэрэг алба хашиж байв.

1990 онд Узбек ССР-ийн Дээд зөвлөлийн депутат болж улс төрийн замналаа эхэлсэн. 1992 оноос Ташкент хотын Мирзо-Улугбек дүүргийн захирагч, 1996-2001 онд Жиззах мужийн захирагч, 2001-2003 онд Самарканд мужийн захирагчаар ажилласан. 2003 оноос 2016 он хүртэл Узбекистаны Ерөнхий сайдаар ажилласан бөгөөд энэ хугацаанд эдийн засгийн шинэчлэл, төрийн үйлчилгээний бүтцийг сайжруулахад анхаарч байв.

2016 оны есдүгээр сард Ерөнхийлөгч Ислам Каримов нас барсны дараа түр орлон гүйцэтгэгчээр томилогдож, арваннэгдүгээр сард болсон бүх нийтийн сонгуулиар Ерөнхийлөгчөөр сонгогдсон. Тэрээр 2021 болон 2023 онуудад дахин сонгогдсон бөгөөд 2023 оны сонгуулиар 87 орчим хувийн санал авчээ.

Мирзиёев Ерөнхийлөгч болсноос хойш Узбекистан улсад эдийн засгийн либералчлал, валютын чөлөөлөлт, гадаад хөрөнгө оруулалтыг нэмэгдүүлэх, хүний эрх, хэвлэлийн эрх чөлөө, нийгмийн оролцоог нэмэгдүүлэх зэрэг олон шинэчлэлийг хэрэгжүүлж эхэлсэн. Түүний удирдлага дор хүчээр хөдөлмөр хийлгэх тогтолцоог халж, улс төрийн хоригдлуудыг суллах, олон улсын байгууллагуудтай харилцааг идэвхжүүлэх бодлого хэрэгжүүлж байна.

Тэрээр “Шинэ Узбекистан” хөгжлийн үзэл баримтлалын хүрээнд боловсрол, эрүүл мэнд, дэд бүтэц, цахим засаглал, олон нийтийн оролцоо зэрэг салбарт томоохон реформуудыг эхлүүлсэн. Гадаад харилцааны хувьд хөрш орнууд болон Европын холбоо, АНУ, БНХАУ зэрэгтэй харилцаагаа өргөжүүлж, бүс нутгийн энх тайван, хамтын ажиллагааг бэхжүүлэхэд идэвхтэй оролцдог аж.

Шавкат Мирзиёевын гэр бүлийн тухайд эхнэр Зироатхон Мирзиёева нь эдийн засагч бөгөөд тэд хоёр охин, нэг хүү болон ач, зээ нартай юм. 

Эх сурвалж:  Britannica, Википедиа, uzbekistan.org, President.uz