Ерөнхий сайд Г.Занданшатар өчигдөр Эх, хүүхдийн эрүүл мэндийн үндэсний төвд ажиллаж, шинэ амбулаторийн барилгын ажил болон эмчилгээний ачааллыг бууруулах зохион байгуулалтын шийдлүүдтэй танилцлаа. 

Ерөнхий сайд эмнэлгийн гадаа яваа хүмүүстэй мэндэлж, эмнэлгийн тусламж үйлчилгээ ямар байгааг асуухад нэг бяцхан охин гүйж ирэв.

Дундговь аймгийн Өлзийт сумын ЕБС-ийн сурагч долоон настай Цэмбэлдоржийн Энхжин охин, Би олон дахин эмнэлгээр яваад байгаа. Эрүүл мэндийн даатгалын санхүүжилт дууссан учир чихний хэнгэргийн хагалгаанд орж чадахгүй байна. Хичээл сургууль орохоос өмнө чихээ эрүүл саруул болгочихмоор байна гэж хэвлүүхэн учирлалаа. 

Ерөнхий сайд, Хурдан эмчлүүлье. Эрүүл мэндийн даатгалын санхүүжилтээс болж олон хүн хохирч байна. Эрүүл мэндийн даатгалын сангийн өр ширний асуудлыг Засгийн газрын маргаашийн /2025.08.13/ хурлаар хэлэлцэнэ. 

Өөрөө гүйгээд ирсэн хүүхдийн асуудлыг шийдэх хэрэгтэй гэхэд, эмнэлгийн захирал "Чихний хэнгэргийн асуудал архаг өвчиндөө орно. Архаг өвчний эмчилгээний 8-р сарын санхүүжилт нь дууссан" гэв. 

Ерөнхий сайд, "Ганц энэ охинд бус олон хүүхдэд тохиолдож буй энэ асуудлыг даруй шийдэх нь зүйтэй" гэв. 

Засгийн газрын ээлжит хуралдаан одоо үргэлжилж байна. Хуралдаанаар Эх хүүхдийн эрүүл мэндийн үндэсний төвд ажилласан асуудлыг танилцуулж, үүсээд буй санхүүгийн дутагдлыг шийдвэрлэх талаар хэлэлцэхээр хэлэлцэх асуудлын жагсаалтад оруулсан байв.