Улаанбаатар хотын агаарын бохирдлыг судлах, агаарын бохирдлын эх үүсвэрүүдээс гарч буй бохирдуулах бодисын хэмжээ, тархалтад мониторинг хийхэд дэмжлэг үзүүлэх зорилгоор БНСУ-ын “3STECH” компани шинэ дэвшилтэт технологи болох “Нисгэгчгүй нисдэг хэрэгсэл”-ийг Монгол улсын Байгаль орчин, аялал жуулчлалын яам, Цаг уур, орчны шинжилгээний газарт үнэ төлбөргүйгээр шилжүүлэн өглөө.        

Уг дрон цаг уурын судалгаа, байгаль орчны мониторинг хийх зориулалттай бөгөөд газрын гадаргаас дээш 3000 метр хүртэл хөөрч агаарын босоо чиглэлийн тархалтын судалгаа явуулах боломжтой. Цаг уурын үндсэн элементүүд болох агаарын температур, чийгшил, даралт, салхины зүг, хурд тодорхойлохоос гадна  агаарын бохирдлыг мониторингийг хийж, РМ10, РМ2.5 болон РМ1 хүртэлх тоосонцрын босоо, хэвтээ чиглэл дэх тархалтыг тодорхойлох хүчин чадалтай аж.

ЦУОШГ-ын дарга С.Энхтүвшин “Дэлхийн өндөр хөгжилтэй орнууд дрон технологийг их ашигладаг болсон. Өмнө нь манайх БНХАУ-д үйлдвэрлэсэн дроныг зураг авахад ашиглаж байсан. Харин Энэхүү дроныг анх удаа цаг уурын зориулалтаар ашиглана. Үүнээс гадна байгаль орчны салбарт ч ихээхэн ач холбогдолтой гэж үзэж байна. Хулгайн анчид, мод бэлтгэгчид, ой хээрийн түймрийн байршил тархалтыг тодорхойлох зэрэг өргөн хүртээг хамарч ажиллана. ”

ЦУОШГ-ын Ахлах мэргэжилтэн Д.Батдорж “Бид хүнд харагдах, амьсгалах түвшний л агаарын мониторинг хийдэг байсан. Харин энэ технологи нь агаарын бохирдлын босоо чиглэлийн тархалтыг хянаж чадна. Энэ нь хүйтэн агаарын масс сууж ирснийг агаарын бохирдолтой агаар нэвтэрч гарч чаддаггүй. Энэ зүй тогтлыг судлах шинэ технологи юм. Ой хээрийн түймрийн голомтыг тогтооход чухал үүрэг гүйцэтгэнэ.” гэв.

Түүнчлэн уг дроныг цаг агаарт зориудаар нөлөөлөх ажиллагаанд дэмжлэг болох, зэрлэг ан амьтны шилжилт хөдөлгөөнийг бүртгэх, хянах, хууль бус ан агналттай тэмцэх, Онцгой байдлын үед ашиглах гэх мэт маш олон чиглэлээр хэрэглэх боломжтой юм.