“Стратегийн ач холбогдол бүхий ашигт малтмалын ордын төрийн эзэмшлийн хувь, хэмжээг орлуулах тухай чуулганы хуралдаанаар хэлэлцэж байна.

УИХ-ын гишүүн О.Батнайрамдал “Орана"- гын гэрээ сайн болсон байсан. Хамгийн гол нь Монголын талд ямар ашиг өгөх нь чухал. Гэхдээ энэ гэрээний үндэсний ханган нийлүүлэгчийг 40 хувь байлгана гэж заасан байна. Энэ хувийг жил бүр нэмэх боломжгүй юу?  ТУЗ-ийн 10 гишүүнтэй байна гэсэн байна. Үүнээс бие даасан 2-3 гишүүн нь Монгол Улсын иргэн байх шаардлагатай" гэв.

УИХ-ын гишүүн Н.Учрал “Энэ төсөл орон нутгийг хөгжүүлэх чиглэлд явж байгаа. Тухайн орон нутгийн хүмүүсийг авч ажиллуулах, гаднын хүн илүү цалин авч, монгол хүн бага цалин авна гэсэн юм үйлчлэхгүй. Хөрөнгө оруулалтын гэрээнд тухайн орон нутгийн хүмүүсээр түлхүү хүний нөөцөө бүрдүүлэхийг тусгасан. Нийт 1600 ажилтантай байхаас 17 нь гаднын ажилтан байна. Мөн орон нутгийн татвар, ус болон газрын хураамж нийлээд 1 тэрбум ам.долларын мөнгөн урсгал зарцуулагдахаар байна. Энэ бол тухайн орон нутгийн хөгжилд дэмжлэг болох болов уу гэж бодож байна. Түүнчлэн тус төсөлд ажиллаж буй хүмүүсийн дундаж цалин 7-12 сая төгрөг байхаар тооцоолж байна. 

УИХ-ын гишүүн С.Ганбаатар "Орано-ын гэрээнд ТЭЗҮ батлагдсан уу. Энэ төсөл хэрэгжиж эхэлбэл  нэн аюултай хог хаягдал 150 тонн гарна. Жилд аюултай хог 750 тонн гарна гэж байгаа. Энэ хог хаягдлыг боловсруулах үйлдвэр барих уу. Энэ асуудлыг тооцсон юм уу? ТЭЗҮ-д хэдэн төгрөг тусгасан байгаа вэ? Энэ гэрээнд маш сайн ажилласан олон хүмүүс байгаа. Гэхдээ француудтай хатуу ярих асуудлууд байгаа шүү. Уул уурхайн яамнаас асууж байна.  

УИХ-ын гишүүн Б.Пүрэвдорж “Өнөөдөр бид АМНАТ-аар орлуулах тухай асуудлыг хэлэлцэж байгаа юм. Энэ асуудлыг эхлээд шийдэх хэрэгтэй байгаа юм.Үүний дараа ТЭЗҮ-ээ батлах юм. Хүхрийн хүчлийн үйлдвэрийг барихад дэмжиж байна. Энэ үйлдвэр маш чухал учир протоколдоо оруулах ёстой байгаа юм.  

УИХ-ын гишүүн Н.Учрал “Төслийн хугацаанд хувьцаа эзэмшигчдээс аливаа төрлийн зээл авахыг зөвшөөрөхгүй. Хэрвээ зээл авахаар бол хувьцаа эзэмшигчийн 100 хувийн саналаар батална гэж заасан. ТУЗ-д 1 хүн монголын талаас байна. Тэр хүн хориг тавих эрхтэй байна. Хог хаягдлын менежментэд 400 сая ам.долларыг тусгасан. Хүхрийн үйлдвэрт 96 сая ам.долларыг зарцуулахаар тусгасан. ТЭЗҮ-ийн бэлтгэл ажил бүрэн хангагдсан.  

Ажлын хэсгийн төлөөлөгч “Төсөл хэрэгжиж эхэлснээс хойш жил бүр 400 гаруй тонн хаягдал үүснэ гэж тооцоолж байна. Үүнээс 250 тонн бага цацрагт хог хаягдал,  аюултай хог хаягдал 150-200 тонн, ахуйн хог хаягдал 800-900 тонн хог хаягдал гарна гэж тооцоолсон. Олон улсын болон Монгол улсын стандартыг ягштал барих шаардлагыг тавьсан. Хог хаягдлын үйлдвэрийг тухайн төсөл хэрэгжүүлэгч эрхэлнэ” гэв.