Хан-Уул дүүрэг 3-р хороо "ДЦС-3" ТӨХК-ийн өндөр даралтын турбин цех дотор гал гарсан. Харин уг осолд нэг хүн амиа алдсан талаар өчигдрийн чуулганд УИХ-ын гишүүн С.Цэнгүүн мэдээлсэн.

Энэ талаар Эрчим хүчний сайд Б.Чойжилсүрэн:
Дулааны III цахилгаан станцад осол гарсан. Энэхүү осолд инженер залуу өртөж амь насаа алдсан харамсалтай хэрэг гарсан. Тэрбээр эхнэр хоёр хүүхэдтэй, салбартаа 20 гаруй жил ажилласан инженер байсан.  Хэргийн газар дээр хуулийн байгууллагууд хяналт шалгалт хийж байгаа. Эрчим хүчний яамнаас ослын шалтгааныг тодруулахаар ажлын хэсэг ажиллаж байгаа ч эрүүгийн хэрэг нээсэн. Тиймээс ёсзүйн хувьд хариуцлага хүлээхэд бэлэн байна. 2025 оны гуравдугаар сард "ТЭЦ-3"-ыг "Эрчис Монгол" компанийн мэдэлд шилжүүлээд хоёр сар болж байна. Харамсалтай үйл явдал болчихлоо. 

Дулааны гуравдугаар цахилгаан станц нь 1965 онд байгуулагдсан, 60 жил болж байна.  Өндөр даралтын 5-р турбин ашиглалтын хугацаа дууссан, ашиглахгүй байгаа. Мөн 7-р турбин ч дуусаж байгаа. Түүнээс гадна нам даралтын 12 мегаваттын 4 турбин бүгд ашиглалтад дууссан. Төвийн эрчим хүчний системд 6 цахилгаан станц холбоотой байгаагаас 220Мв-тай тэнцэх хэмжээний турба генераторууд ашиглалтын хугацаа дууссан, хэзээ мөдгүй осол гарахад бэлэн сүүлийн хэдэн жил болсон. Уг асуудлаар Засгийн газарт танилцуулга бэлдсэн байгаа. 

УИХ-ын гишүүн С.Цэнгүүн үзэл бодолдоо үнэнч байгаад нь талархаж байна. Намайг шүүмжилбэл олон нийтийн зүгээс дэмжлэг ирж, нэр хүнд нь өснө гэж түүнд хэн нэгэн хэлчихсэн юм шиг байна. Тийм бол өдрийн таван удаа ч шүүмжилж болно. Гол нь бид тогтой байх уу эсэх нөхцөл байдалдаа тулсан. Залуу гишүүн үзэл бодолдоо үнэнч байснаар олны дэмжлэгийг авах байх. Ослыг олон нийтээс нуусан гэж ярьж байна лээ. Нуух ямар ч шаардлага байхгүй.