Дэлхийн озоны үе давхаргыг хамгаалах өдөрт зориулж “Монреалын протокол”-ын үйл хэргийг дэмжиж буй талаар Байгаль орчин, уур амьсгалын өөрчлөлтийн яам болон Озоны үндэсний албанаас мэдээлэл хийлээ.

“Озоны хий буюу давхарга нь нарнаас ирж буй хэт ягаан туяаг өөртөө шингээн авч байдаг. Ингэснээр амьд байгаль, хүн амын эрүүл мэндийг хамгаалдгаараа маш чухал давхарга юм. Тухайлбал, хүний нүдний болор цайх, арьсны өвчин зэргээс хамгаалдаг.  

1928 оноос эхлэн  хлор, фторт нүүрс төрөгчийн хийг хөргөлтийн системд ашиглаж эхэлсэн. Энэ нь ямар нэгэн байдлаар агаар мандалд хөөрч Озоны давхаргыг цоолж эхэлсэн. Тиймээс уг хөргөлтийн бодисыг өөр төрлийн бодисоор солих шаардлага тулгарсан.

Өөр химийн нэгдэл орсон бодисыг ашиглаж буй боловч дэлхийн дулааралд нөлөөлж байгаа. Үүнийг хүлэмжийн хий гэж нэрлэх бөгөөд агаар мандлын дулаарлыг бий болгож байна. Ингэснээр агаар мандал хямарч байгалийн гамшигт үзэгдэл нэмэгдсэн.

Үргэлжлүүлэн "Хүлэмжийн хийг бууруулах үүднээс 2016 онд дэлхийн улс орнууд Парисын хэлэлцээрийг байгуулсан. Манай улс энэ хэлэлцээрт нэгдэн орсон юм. Монгол Улс хүлэмжийн хийг бууруулахаар үндэсний хөтөлбөрөө батлаад явж буй. 21 аймаг 9 дүүрэгт судалгаа хийсэн. Мөн хөргөлтийн системээр ажилладаг хүмүүст гэрчилгээ олгох ажил явагдаж байна.  

Манай хөргөлт, халаалтын салбарынхан маань дэлхийн хамгийн эмзэг Озоныг хамгаалахаар маш олон ажлыг гүйцэтгэж байна. Озоны давхаргыг хамгаалахад хамгийн гол нь хөргөлтийн системүүдэд ашигладаг хөрөх бодисын техник үйлчилгээг хийдэг техникчдийн чадварыг дээшлүүлэх шаардлагатай. Энэ хүрээнд бид сургалтын хөтөлбөрийг гаргасан. Энэ сургалтаараа хөрөх бодисын тээвэрлэлт, суурилуулалт зэргийг заана" гэв.