Төв аймгийн Баян, Баянжаргалан сумдын нутагт байрлах Монгол Улсын анхны том чадлын станц болох “Бөөрөлжүүтийн цахилгаан станц” /2024.10.05/ нээлтээ хийлээ. Тус станцын бүтээн байгуулалтыг “Бөөрөлжүүтийн уурхай, цахилгаан станцын цогц төсөл”-ийн хүрээнд “Бодь интернэшнл” ХХК-ийн хөрөнгө оруулалтаар “Цэцэнс Майнинг энд Энержи” ХХК амжилттай хэрэгжүүлж байна.

Цахилгаан эрчим хүчний том чадлын шинэ эх үүсвэр зайлшгүй шааардлагатай байгаа энэ цаг үед 150 МВт-ын хүчин чадал бүхий эхний блокоо ашиглалтад оруулж буй “Бөөрөлжүүт цахилгаан станц” нь цаашид үе шаттайгаар хэрэгжин нийт 600 МВт-ын хүчин чадалтай болох юм.

“Бөөрөлжүүтийн тал” нүүрсний уурхайг түшиглэн тус уурхайн аман дээр баригдаж буй "Бөөрөлжүүтийн цахилгаан станц" нь төвийн бүсийн нэгдсэн сүлжээнд холбогдон цахилгаан эрчим хүчний хязгаарлалтыг бууруулах, түүнчлэн эрчим хүчний системийн тогтвортой, найдвартай, аюулгүй ажиллагаанд чухал үүрэг гүйцэтгэх хамгийн орчин үеийн эх үүсвэр болно.

Станц ашиглалтад орсноор Монгол Улсын цахилгаан эрчим хүч хэрэглэгчдийн нийт 80-аас илүү хувийг эзэлдэг Төвийн бүсийн нэгдсэн сүлжээний 67 мянга гаруй аж ахуйн нэгж, 660 мянга гаруй айл өрхийн цахилгааны хэрэглээнд хувь нэмрээ оруулан, Улаанбаатар хотод өсөн нэмэгдэж буй цахилгаан эрчим хүчний хэрэглээг хангаж, импортын эрчим хүчийг орлох зэрэг олон чухал ач холбогдолтой.  



2024, 2025 онд ашиглалтад орох 300 МВт хүчин чадлын үед нийт 70 гаруй барилга, байгууламж барьж шинээр ашиглалтад оруулах бөгөөд суурилагдсан нэгж блокын хүчин чадал хамгийн том, утааны хэм дэх тоосны гарцыг дөрөв дахин багасгах Цахилгаан шүүлтүүр, Усны хаягдалгүй агаарын хөргөлтийн конденсатор, Монгол дахь анхны 220 килоВольтын [кВ] хийн хөндүүрүүлэгчтэй хаалттай хуваарилах байгууламж, түлшний бүрэн шаталт явагдах эргэлтэт буцламтгай үет зуух зэрэг үр ашиг өндөр, байгаль орчинд үзүүлэх нөлөөлөл хамгийн бага байх Монгол улсад АНХНЫ гэх тодотголтой олон дэвшилтэт технологитой цахилгаан станц болж байна.

Түүнчлэн 220 килоВольтын хос хэлхээт цахилгаан дамжуулах агаарын шугамуудыг барьж байгуулан Багануур, Сэргэлэн дэд станцуудтай холбож байгаа нь Улаанбаатар хотыг тойрсон тойрог сүлжээ үүсгэж, Төвийн бүсийн эрчим хүчний системийн найдвартай, тогтвортой ажиллагааг сайжруулахад чухал үүргийг гүйцэтгэнэ.

“Бөөрөлжүүт цахилгаан станц” нь 600 МВт-ын бүрэн хүчин чадлаараа ашиглалтад орсноор Цахилгаан станцад 540, уурхайд 500, нийт 1000 гаруй шинэ байнгын ажлын байр нэмэх, 2000 гаруй хүнтэй цомхон суурьшлын бүс байгуулагдах, түүнчлэн түүнд холбогдох төмөр зам, хатуу хучилттай авто зам, дэд бүтцийг барьж байгуулах зэргээр бүтээн байгуулалтуудыг цогцоор нь төлөвлөсөн бөгөөд орон нутгийн болон улс орны нийгэм эдийн засгийн хөгжилд олон эерэг нөлөөллийг үзүүлэх юм.