Мьянмарын төв хэсэгт болсон энэ зууны хамгийн хүчтэй буюу 7.7 магнитудын хүчтэй газар хөдлөлт 1700 хүний аминд хүрээд байна.

Гэтэл энэ гамшгийг үл харгалзан тус улсын цэргийн байгууллага буюу Жунта босогчдын тосгон руу цэргийн довтолгоо хийсээр байгааг босогчид шүүмжиллээ.

54 сая хүн амтай Мьянмар дахь хамгийн эртний угсаатны армиудын нэг Карены Үндэсний холбоо /The Karen National Union/ мэдэгдэлдээ "газар хөдлөлтийн улмаас хүн ам асар их хохирол амсаж байгаа ч гэсэн жунта нар энгийн иргэдийн бүс нутгийг агаараас бөмбөгдсөөр байна" гэжээ.

3400 хүн гэмтэж, 300 хүн сураггүй болоод буй энэ үед цэргийнхэн аврах ажиллагааг нэгдүгээрт тавих ёстойг босогчид хэлэв.

2021 онд Нобелийн энх тайвны шагналт, ардчилсан сонгуулиар сонгогдсон Аун Сан Су Чиг баривчилсан төрийн эргэлтийн дараа цэргийн дэглэмд шилжсэн Мьянмар түүнээс хойш иргэний дайнтай байгаа билээ.

Эх сурвалж: Reuters