Нийслэлийн Засаг дарга Э.Бат-Үүл 2013 оны 09 сарын 15-ны өдөр "Барилгын ажилд илэрсэн зөрчлийг арилгах, гүйцэтгэлд хяналт тавих тухай" захирамж гаргасан.

Уг захирамжаар техникийн нөхцөл аваагүй цахилгааны 15, дулааны 16, цэвэр бохир усны 17, батлагдсан архитектур төлөвлөлтийн даалгаваргүй, эскиз зураг болон ерөнхий төлөвлөгөөний зураг батлагдаагүй 10, барилгын зураг төсөлд магадлал хийгдээгүй 16 барилгын жагсаалтыг гаргасан билээ.

Энэхүү жагсаалтад нийт 74 барилгын компани бичигдсэн бөгөөд 15 компани холбогдох зөрчлөө арилгаж зохих хууль, журмын дагуу техникийн нөхцөлөө авсан байна. Харин техникийн нөхцөл аваагүй нийт 59 барилга байгаа бөгөөд эдгээр барилгыг ус, дулаан, цахилгаанаар хангахгүй гэдгийг мэдэгдсэн юм.

Мөн Ус сувгийн удирдах газар, Улаанбаатар цахилгаан түгээх сүлжээ ХК, Улаанбаатар Дулааны шугам сүлжээ ХК, нийслэлийн Ерөнхий төлөвлөгөөний газраас ирүүлсэн мэдээллийг нэгтгэж дээрх барилгуудын жагсаалт болон хариуцах эздийн нэрсийг зарласан байна.

Тиймээс иргэд болон банк санхүүгийн байгуулагууд сонгосон барилгын компанийн техникийн нөхцөлийн зөвшөөрлийг сайтар судалж үзэхийг анхааруулж байна.

Н.Баасандэмбэрэл