МУИС өнгөрсөн дөрөвдүгээр сарын 25- наас элсэлтээ цахимаар авч эхэлсэн. Элсэгчдийн бүртгэл болон энэ жилийн босго оноо хэд байгаа талаар МУИСийн Хэвлэл мэдээлэл, олон нийттэй харилцах хэлтсийн мэргэжилтэн А.Пагмасүрэнгээс тодруулсан юм.

-МУИС-ийн элсэлтийн бүртгэл эхлээд багагүй хугацаа өнгөрч байна. Бүртгэл хэд хоног үргэлжлэх вэ. Мөн бүрэлдэх үүн сургуулиудын бүртгэл адилхан хугацаанд явагдаж байгаа юу?
-Монгол Улсын их сургууль 2016-2017 оны хичээлийн жилийн бакалаврын өдрийн хөтөлбөрийн элсэлт орон даяар дөрөвдүгээр сарын 25-наас эхэлсэн. Энэ сарын 30-ны 18:00 цаг хүртэл онлайн хэлбэрээр явагдаж байгаа.

Тиймээс элсэгчдээ амжиж бүртгүүлээрэй гэж хэлье. МУИС нь ирэх хичээлийн жилд Шинжлэх ухааны сургууль, Хэрэглээний шинжлэх ухаан, инженерчлэлийн сургууль, Бизнесийн сургууль, Хууль зүйн сургууль, Олон улсын харилцаа нийтийн удирдлагын сургууль, Завхан сургууль, Орхон сургууль гэсэн долоон бүрэлдэхүүн сургуульдаа элсэлт авч байна.

-Элсэгчдийн босго оноог энэ жил хэдээр тогтоосон бэ. Өндөр оноотой элсэгчдэд сургалтын төлбөрийн хөнгөлөлт олгох, тэтгэлэгт хамруулах зэрэг боломжуудыг олгож байгаа гэж сонссон?
-Манай сургууль элсэгчдэд хэд хэдэн боломжуудыг олгож байгаа. Тухайлбал, тодорхой нэг мэргэжилд бус сонирхож буй мэргэжил нь харьяалагдах бүрэлдэхүүн сургуульд элсэх давуу талтай.

Мөн элсэгчид МУИС-ийн ерөнхий суурь хичээлээс чөлөөтэй сонгон суралцаж сургалтын чанар амжилтаар хүссэн мэргэжлээ журмын дагуу сонгох боломжтой. Босго онооны хувьд, суурь шалгалт нь 750-аас дээш оноотой ШУС-БУС, ХШУИС-ийн эхний 50 элсэгч /сургууль тус бүрт 25/ болон улсын олимпиадад эхний байр эзэлсэн элсэгчийн эхний хичээлийн жилийн сургалтын төлбөрийг 50 хувь хөнгөлж өгнө.

Мөн үндэсний болон МУИС-ийн олон улсын байгууллага, гадаад дотоод, Засгийн газрын оюутан солилцооны тэтгэлэгт хөтөлбөрт хамрагдах, сургалтын таатай орчин нөхцөл боломжийг МУИС санал болгож байна.

Э.Бэрцэцэг