БНСУ-ын жижиглэнгийн зах зээлийн номер нэг сүлжээ Emart хайпермаркетийн Монгол дахь анхны салбарын албан ёсны нээлт энэ сарын 28-нд болно.

Зургаан давхар барилгатай “Emart Чингис” салбар нь нийт 43 мянган м.кв талбайтай. Дэлгүүр, банк, олон улсын хоолны газрууд, кофе шоп, тоглоомын төв зэрэг 40 гаруй үйлчилгээг нэгэн доор төвлөрүүлсэн.

Нийт 33 мянган төрлийн бараа бүтээгдэхүүнийг хэрэглэгчиддээ санал болгож байна. Мөн Emart хайпермаркетийн гурав, дөрөвдүгээр давхарт 260 автомашины дулаан зогсоолтой.

“Улаанбаатар хот болон томоохон аймгуудад нийт 20 гаруй салбар байгуулахаар төлөвлөж байна. Ингэснээр 1500 гаруй ажлын байр бий болно. Зөвхөн “Emart Чингис” салбарт л гэхэд 300 гаруй шинэ ажлын байр нээгдэж байна” гэж “Скай хайпермаркет” компанийн гүйцэтгэх захирал Б.Болор-Эрдэнэ хэллээ.

Дотоодын үйлдвэрлэгчдийг дэмжих зорилгоор Монголын 400 гаруй ханган нийлүүлэгч  компанитай гэрээ хийжээ.  Emart дэлгүүр нь үндэсний үйлдвэрлэлээ дэмжих том суваг болно гэв.

“Emart Чингис” салбарын албан ёсны нээлт энэ сарын 28-нд 11.00 цагаас болно. Нээлтийн арга хэмжээнд Яг түүн шиг шоуны ялагч, дуучин П.Баярцэнгэл оролцоно. Хүрэлцэн ирсэн хэрэглэгчдэд олон сюрпризүүд бэлджээ. Тухайлбал 100 гаруй нэр төрлийн бараа бүтээгдэхүүнд хямдрал зарлажээ.

Мөн “Нээлтийн үеэр гишүүнчлэлийн картын бүртгэл, шинэ хэрэглэгчийн урамшуулал явагдана” гэж “Скай хайпермаркет” компанийн Маркетинг, төлөвлөлтийн хэлтсийн дарга Д.Алтанхундага хэллээ.

Emart сүлжээг “Алтай холдинг” ХХК оруулж ирсэн бөгөөд Монгол Улсад 166 дахь салбараа нээж байгаа юм. Emart сүлжээ дэлгүүрийг Монголд нээхийн тулд “Алтай холдинг” компанийнхан хоёр жилийн өмнөөс эхэлжээ. Монголд судалгаа шинжилгээ, эрэл хайгуул хийсэн бөгөөд органик бүтээгдэхүүн үйлдвэрлэгчдийг олж, түншлэх ажилд ихэнх цагаа зарцуулсан гэдгийг тэд онцолж байв.