УИХ-ын гишүүн асан Д.Батбаяр оффшор дансны мэдээлэлд нэр нь холбогдсон талаар албан ёсны тайлбар хийлээ. Түүн рүү Японоос ч сэтгүүлчид тайлбар хүсчээ.

Олон улсын эрэн сурвалжлах сэтгүүлчдийн хорооноос өнгөрсөн шөнө дэлгэсэн Панамын баримтад УИХ-ын гишүүн асан, Ерөнхий сайд Н.Алтанхуягийн ахлах зөвлөхөөр ажиллаж байсан Д.Батбаярын нэр гарсан юм. Энэ талаар тэрээр,

"Би төрөөс төрсөн тэрбумтан биш. Тендерийн хэрэгт холбогдож үзээгүй. Түмэн олны өмнө хөлсөө урсган, барилдаж хэдэн төгрөг олсон нь үнэн. Гэхдээ би Япон, Монголоос өөр газар данс нээлгэж үзээгүй. Аль 25 жилийн өмнө, барилддаг байхдаа ажлын шаардлагаар цалингийн, эрүүл мэндийн данс нээлгэсэн юм. Би энд амьдарч байгаа тул одоо тэр данснууд хоосон. Цаанаас нь хаасан юм уу, мэдэхгүй. Панамын баримтууд дунд миний нэр байгаа нь андуурал болсон болов  уу. Эсвэл бодлогоор АН-аас заавал нэг хүний нэр байх ёстой гэсэн, сонгуулийн ажил юм болов уу, би мэдэхгүй байна. Шаардлагатай бол сэтгүүлчдийн олон улсын байгууллагад хандана. Надад татвараас нуугдах шаардлага байхгүй. Би Монголд үйл ажиллагаа явуулдаг компаниудад л хувь эзэмшдэг" гэв.         

Тэрээр ирэх сонгуульд нэр дэвших хүсэлтээ АН-д албан ёсоор гаргасан бөгөөд намынхаа Үндэсний зөвлөлдөх хорооны шийдвэрийг хүлээж байгаа юм байна. 

Гэрэл зургийг Б.Бямба-Очир