-“Гуанжоу-2010” Азийн тоглолт эхлэхэд 4 хоног үлдлээ-

Азийн спортын XVI наадам энэ сарын 12-27-нд БНХАУ-ын өмнөд хэсгийн Гуанжоу хотод болно. Гуанжоу нь Хятад улсаас Азийн тоглолтыг хүлээн авч буй хоёр дахь хот юм. Өмнө нь 1990 онд Бээжин хотод Азийн тоглолт зохиогдож байсан аж. Азийн наадам нь цар хүрээ, оролцогчдын тоо, чанар, чадал, чансаагаараа олимпийн наадмын дараа ордог спортын их наадам юм.

Энэ удаагийн наадамд түүхэндээ байгаагүй 42 спортын төрлөөр 476 багц медалийн төлөө Азийн 45 орноос цугласан тамирчид хурд хүч, авхаалж самбаа, онч мэргэнээ сорино. Гуанжоу хот нь 2004 оны долдугаар сарын 1-нд Катарын Дохад болсон Азийн олимпийн зөвлөлийн (OCA) хурлаар зохион байгуулах эрхийг Амман (Йордан), Куала Лумпур (Малайз), Сөүл (БНСУ) хотуудтай өрсөлдөж олж авчээ. Мөн наадмын зарим уралдаан тэмцээн хөрш Донггуан, Фушан, Шанвей хотуудад зохион байгуулагдана.

Монгол Улс 1974 оны Азийн долдугаар наадамд анх удаа оролцож байв. Анхны наадамд спортын зургаан төрлөөр 28 тамир- чин оролцож байжээ. Манай тамирчид Азийн наад- муудад 12 алт, 17 мөнгө, 53 хүрэл медаль хүртэж байсан аж. Энэ жил Гуанжоуд болох Азийн XVI наадамд Монгол Улсаа төлөөлж 28 спортын төрөлд 222 тамирчин оролцоно. Нээлтийн ажиллагаанд Монголын багийн тугийг Бээжингийн олимпийн аварга, хөдөлмөрийн баатар Н.Түвшинбаяр барьж жагсана.

ГУАНЖОУ ХОТЫН ТУХАЙ ТОВЧХОН
Байршил: Гуандун мужийн Гуанжоу хот нь өмнөд Хятадад оршдог. Өмнөд Хятадын тэнгисийн боомт хот. Хонг Конгоос 120 км-ийн зайтай.
Хүн ам: 9.754.600
Цагийн бүс: Улаанбаатартай адил 2

“ГУАНЖОУ-2010”-ЫН БЭЛГЭДЭЛ, МЕДАЛЬ
Тэмцээний албан ёсны бэлгэдэл (маскот) Лу Янян тэргүүтэй таван ямаа юм.
Азийн наадмын медаль: Гуанжоу хот нь эрт цагийн “Торгоны зам”-ын гол боомт, эхлэл цэг нь байсныг бодож Тэнгисийн торгоны зам нэртэйгээр медалийг урлажээ. Медаль дээр Азийн олимпийн зөвлөл (OCA), Азийн наадмын лого, галаар тургих луу, дураараа нисэх бүргэд дүрслэгдсэн байна. 980 грамм жинтэй, 70 см урттай Азийн тоглолтын бамбарыг “Далайн татлага” хэмээн нэрлэжээ. 2010 оны аравдугаар сарын 9-нд Хятадын Цагаан хэрмэн дээр бадамлан ассан. Томоохон хотуудыг дамжсаар Гуанжоу хотод ирнэ.

АЗИЙН ТОГЛОЛТООС АЛТАН МЕДАЛЬ ХҮРТСЭН МОНГОЛЫН ТАМИРЧИД
Дашдоржийн Цэрэнтогтох-1974 он. Эрэгтэй, чөлөөт бөх 90 кг.
Хорлоогийн Баянмөнх - 1974 он. Эрэгтэй, чөлөөт бөх 100 кг.
Зэвэгийн Ойдов - 1978 он. Эрэгтэй, чөлөөт бөх 68 кг.
Буяндэлгэрийн Болд - 1982 он. Эрэгтэй, чөлөөт бөх 68 кг.
Зэвэгийн Дүвчин - 1982 он. Эрэгтэй, чөлөөт бөх 82 кг.
Пунцагийн Сүхбат- 1990 он. Эрэгтэй, чөлөөт бөх 82 кг.
Цэрэнбаатарын Цогтбаяр-1994 он. Эрэгтэй, чөлөөт бөх 57 кг.
Халиуны Болдбаатар - 1998 он. Эрэгтэй, жүдо.
Хишигбатын Эрдэнэт-Од - 1998 он. Эмэгтэй, жүдо 57 кг.
Оюунбилэгийн Пүрэвбаатар - 2002 он. Эрэгтэй, чөлөөт бөх 60 кг.
Дамдинсүрэнгийн Нямхүү - 2006 он. Эрэгтэй, жүдо 81 кг.
Хашбаатарын Цагаан- баатар-2006 он. Эрэгтэй жүдо 66 кг. Азийн XVI тоглолтод манай 222 тамирчин спортын 28 төрөлд өрсөлдөнө

М.Тилеген