Монголын хошин урлагийн загалмайлсан эцэг гэгдэх гавьяат жүжигчин Б.Батзаяаг найман настай балчраас 80 настай буурал хүртэл андахгүй ээ. Багаасаа л урлагийн халуун тогоонд чанагдсан тэрбээр өөрийн авьяасаараа хэдийнэ олны хайр хүндэтгэлийг хүлээсэн.

Саяхан 25 дугаар суваг телевизийн "Танайд хоноё" нэвтрүүлгийн уран бүтээлчид Б.Батзаяагийнх гэх айлд хоносон. 16 настайдаа анхны кинондоо тоглож 3000 төгрөгийн урамшуулал авч байлаа гээд гайхуулж байсан тэрбээр өдгөө ядарч явна. Гэвч Заяа гавьяат "ах нь сэтгэлээрээ баян хүн шүү" хэмээн хээв нэг ярьж байна лээ. Түүний өмнөх амьдралыг сөхөөд ч яахав. Алдахгүй амьдардаг хүн гэж хаана байх вэ. Өөдрөг үзэлтэй түүнийг буян заяа нь түших байлгүй дээ.