“Сүү” ХК-ийн менежментийн тогтолцоон дахь Аюулын дүн шинжилгээ ба эгзэгтэй цэгийн хяналтын тогтолцоог MNS CAC/RCP-1:2003, CAC/RCR-1:1969 стандартын шаардлагын дагуу нэвтрүүлснийг Стандарт, Хэмжил зүйн газар батламжиллаа. HACCP гэрчилгээг 2021.12.25-ны өдөр “Сүү” ХК-ийн Үйлдвэрлэл эрхэлсэн дэд захирал Д.Бямбажавд Стандарт, хэмжил зүйн газрын Бүтээгдэхүүн, тогтолцооны баталгаажуулалтын газрын дарга В.Ганзориг гардуулан өглөө.  

Үүсэн байгуулагдсан 1958 оноос хойш “Сүү” ХК Монгол болон олон улсын стандартуудыг үйлдвэрлэл, үйл ажиллагаандаа нэвтрүүлэн, амжилттай мөрдөн ажиллаж, дэлхийн хэмжээнд хүлээн зөвшөөрөгдөх менежментийн нэгдсэн тогтолцоог хэрэгжүүлээд байна. Товч дурдвал,

“Сүү” ХК-ийн Сорилтын лаборатори нь 2000 оноос эхлэн үйл ажиллагаандаа ISO 17025 стандартыг нэвтрүүлэн 9 дэх удаагаа итгэмжлэгдсэн.

2010 оноос эхлэн компанийн хэмжээнд ISO 9001 Чанарын удирдлагын тогтолцоог нэвтрүүлэх ажлыг эхлэн анх SAIGlobal компаниас 2011 онд баталгаажилтаа хийлгэсэн ба Чанарын удирдлагын тогтолцооны шаардлагын дагуу хэрэглэгчийн хэрэгцээ болон хууль, тогтоол, стандартын шаардлагад бүрэн тохирсон, чанарын удирдлагын тогтолцоог хэрэгжүүлэн, баримтжуулах, хянах, үл тохирлоос урьдчилан сэргийлж,  байнгын сайжруулалт хийн ажиллаж байна. Түүнчлэн 2019 оноос хойш ISO 9001:2015 стандартын шаардлагаар баталгаажсан.

ХЭМАБ-ын удирдлагын тогтолцоог бүрдүүлэх, ажилтнуудад  зөв тогтсон дадал зуршлыг бий болгохын тулд 2017 оноос Хөдөлмөрийн эрүүл мэнд, аюулгүй байдал OHSAS 18001 стандартын шаардлагыг компанийн хэмжээнд нэвтрүүлэн, SAIGlobal компаниас 2017 онд баталгаажсан. 2019 оноос шинэчлэгдсэн ISO 45001 стандартын шаардлагын дагуу үйл ажиллагаандаа сайжруулалт хийж СХЗГ-ын баталгаажилтад хамрагдаад байна.

Мөн бүтээгдэхүүнтэй холбоотой хууль тогтоомж, стандарт, техникийн зохицуулалтын шаардлагыг бүрэн хангаж хүний амь нас, эрүүл мэнд, хүрээлэн буй орчинд аюулгүй гэдгээ баталгаажуулан СХЗГ-аас 2019 онд Ундны сүү, Тараг, Тослог цагаан идээ, Уураглаг цагаан идээ, Зайрмаг зэрэг бүх төрлийн бүтээгдэхүүнд “Аюулгүйн тэмдэг” хэрэглэхээр баталгаажсан юм.

2019 оноос Пэт тарагны үйлдвэрлэлд түүхий эд хүлээн авах, савлах, түгээх гэсэн хамрах хүрээний дагуу хүнсний аюулгүй байдлыг бүрэн хангасан бүтээгдэхүүнийг хэрэглэгчдээ нийлүүлэх зорилгын хүрээнд НАССР тогтолцооны шаардлагыг бүрэн нэвтрүүлэн, 2021.11.17-ны өдөр СХЗГ баталгаажууллаа.

Бүтээгдэхүүн, тогтолцооны баталгаажуулалтын газрын дарга В.Ганзориг, “Стандарт бол үйл ажиллагааг сайжруулах зорилготой АРГА ХЭРЭГСЭЛ юм. Эдийн засгийн олон эерэг үр дүнг стандарт нэвтрүүлсэн байгууллагууд хүртэж байна. Стандартын итгэмжлэл гэгч “Гүүрээр” үйлдвэрлэгчид дэлхийн зах зээлд бүтээгдэхүүнээ гаргана” хэмээн онцлов.