Хүний эрхийн үндэсний комисс /ХЭҮК/ Монгол Улс дахь хүний эрх, эрх чөлөөний байдлын талаарх 24 дэх илтгэлийг УИХ-д хүргүүлсэнтэй холбогдуулан “Хүний эрх ба Технологи” сэдвийн хүрээнд мэдээлэл өглөө.

Тус илтгэл зургаан үндсэн бүлэгтэйгийн нэг нь “Хүний эрх ба цахим технологи” юм. Энэ бүлгийн хүрээнд УИХ-д найман саналыг танилцуулсан байна. Саналыг УИХ хэлэлцэн тогтоол гаргаж, Засгийн газарт холбогдох үүрэг чиглэл болгон өгдөг.

Энэ бүлэгтэй холбоотойгоор илтгэлд “Цахим технологи манай улсын хөгжилд чухал үүрэгтэй ч хүний эрхийн өндөр эрсдэлтэй. Үүнээс хамгаалах эрх зүйн орчин бүрдээгүй” гэсэн ерөнхий дүгнэлтийг гаргажээ.

УИХ-д хүргүүлсэн саналуудаас дурдвал

• Цахим технологитой холбоотойгоор нэвтрүүлж буй үйлчилгээ, үйл ажиллагаа нь хүний эрхэд нөлөөлөх байдлын үнэлгээг зайлшгүй хийх,
• Мэдээллийн эзний эрх, мэдээлэл хариуцагч болон мэдээлэл боловсруулагчийн үүргийн зөрчлийг Зөрчлийн тухай хууль болон Эрүүгийн хуульд тусгах, гэм буруутай этгээдийн хариуцлагыг нэмэгдүүлэх,
• Дэлхийн нийтийн түгээмэл чиг хандлагын дагуу мэдээлэл хамгаалах эрх бүхий бие даасан байгууллагыг Засгийн газрын бүтцэд байгуулах,
• Хүнийг тагнах, мөрдөн мөшгих боломжтой бүх төрлийн цахим төхөөрөмж нийтийн болон хувийн орон зайд байрших дуу, дүрсний бичлэгийн систем, хүний биометрик мэдээллийг зохицуулах эрх зүйн зохицуулалтыг сайжруулж, халдашгүй чөлөөтэй байх эрх чөлөөг хамгаалах,
• Хиймэл оюуны хөгжүүлэлт, ашиглалт, хүн төвтэй ялгаварлан гадуурхалтаас ангид мэдээлэл, өгөгдлийн боловсруулалт ил тод, хариуцлагатай байх зэрэг юм.

Илтгэлийн бүрэн эхээр нь ЭНД дарж унших боломжтой.