УИХ-ын Хууль зүйн байнгын хорооны хуралдаанаар УИХ-ын гишүүн Б.Энхбаяр "Сейфнээс нь 7.5 тэрбум төгрөг гарсан С.Батдөл гэж нөхөр ШШГЕГ-ын харьяа Богд уулан дахь амралтын газар ялаа эдэлж байгаа юм билээ. Засгийн газар яаж ажиллаад байгаа юм бэ. Тэгэхээр түүнийг амралтын газар амрааж байгаа сайд байна гэсэн үг. Өөрийг нь илчлээгүйн төлөө Богд ууланд тэр хүнийг амрааж байна гэсэн үг. Цаашдаа эзнийг нь олж шийтгэж байгаарай, эзэн нь тодорхой харагдаад байгаа шүү" гэв.

2024 оны 9 дүгээр сараас эхлэн “Төр хурх”-ын амралтын газар 1 сар гаруй хугацаанд галчаар ажилласан гэв.

ШШГЕГ-ын дарга Б.Нандинболор:
ШШГЕГ-ын 409-р хорих ангид С.Батдөл ялаа эдэлж байгаа. Гурван шатны шүүхээс 7 жил 4 сарын хорих ял авсан. БЗД-ын товчоо өнгөрөөд Ногоон зоорийн дэнж дээр байдаг хорих ангид одоогоор ялаа эдэлж байна. Өмнө нь 2024 оны 9 дүгээр сараас Төр Хурхын амралтын газрын аж ахуйн хэсэгт галчаар ажилласан. Хүйтний улирал эхэлдэг учир 4 хоригдол харуул хамгаалалтын ажилтнуудын хяналтан дор галч хийсэн. Амралт биш, манай өндөр настан, ахмадуудаа, ажилтнуудаа амрааж сувилдаг аж ахуйн газар гэж явдаг. Хуулиар хориглосон зүйл байхгүй, аль ч хоригдлыг гаргаж болно. Ингэхдээ тэргүүн дэд даргын ахалсан хорих ял эдлүүлэх албаны зөвлөлөөс хэлэлцэж хуваарилалтыг хийж, прокуророос зөвшөөрөл авч гардаг. С.Батдөл нэг сар 20 хоногийн хугацаанд галч хийгээд буцаад хорих анги руугаа шилжсэн.