-Арай гэж "Маам сүү ууж" байтал "Осор, Сосор, Марал" орж ирээд "лаа үлээгээд" байна
-Харин тийм ээ, нэмээд "Дондог даам сурах" гээд
-Пунцаг, Щедрин нэмэгдэхээс өмнө Маралын лааг үлээлгэх юмсан даа, хүү минь ээ гэх наргианыг нэгдүгээр ангийн бяцхан хүүхдүүдтэй ээж аавууд мэдэцгээж буй биз ээ.

Цэцэрлэгийн ангиас сурагчийн ширээ рүү шилжсэн хүүхдүүд А үсэг чадан ядан бичин "Эмээ сүү саав. Маам сүү уув" гэж холбож уншиж суусан жаалууд нэг жилийн хугацаанд харин өгүүлбэртэй бодлогыг төвөггүйхэн уншиж ойлгоод баганаар бодож сурч төгслөө.

Бид Ерөнхий боловсролын 21-р сургуулийн 1И ангийнхны 2023-2024 оны хичээлийн жилийн сүүлийн өдөр очин танилцав. Анги 42 хүүхэдтэй ч энэ өдөр 20 хүүхэд хичээлдээ иржээ. Залуухан ангийн багштай ч хичээл нь маш сонирхолтой байлаа.

Хүүхдийн хөөрхөн инээд, хөгжилтэй яриа, хамгийн түрүүнд бичиж дуусгаснаа багшдаа гайхуулах эдгээр хүүхдүүд Эмээ, маам хоёр сүү уув гэж холбон уншсаар эцэст нь цоожоо засаад тушаачихлаа хэмээн заримдаг есөн гийгүүлэгч, эгшигт 7 гийгүүлэгчээ төвөггүйхэн суралцаж, хүсэн хүлээсэн зуны амралттайгаа золгож байна.

Гэрэл зургуудыг: Г.Өнөболд