Афганистаны ерөнхийлөгч Хамид Карзай олон улсын цэргийн хүчний эвслийн байрладаг Манас цэргийн баазын түрээсийн хугацааг сунгахыг хүссэн захидлыг Киргизстаны ерөнхийлөгч Курманбек Бакиевт илгээжээ.

Уг цэргийн баазад өнөөдрийн байдлаар Австрали, Дани, Итали, Испани, Өмнөд Солонгос, Холланд, Норвеги, Шинэ Зеланд, Польш, Турк, Францын энхийг сахиулагчид байрлаж байгаа юм. Өнгөрсөн дөрөвдүгээр сард гадаадын цэргийн анги нэгтгэлийн байрлах хугацаа дуусгавар болсон гэх зарлигт Киргизстаны ерөнхийлөгч гарын үсэг зураад байсан.

Тиймээс улс орныхоо тусгаар тогтнол аюулгүй байдлын үүднээс Афганистаны ерөнхийлөгч ийнхүү захидал илгээсэн байна.

Америкийн агаарын цэргийн хүчний албан хаагчид голдуу байрладаг тус баазыг 2001 оноос хойш Афганистан дахь НАТО-гийн цэргийн ажиллагаанд дэмжлэг үзүүлэх үүднээс түрээсэлжээ. Екатеринбург хотод болох Шанхайн хамтын ажиллагааны байгууллагын дээд хэмжээний уулзалтын үеэр хоёр улсын төрийн тэргүүн нар уулзаж энэ талаар ярилцах аж.

ШХАБ-ын дээд хэмжээний уулзалт энэ сарын 15-16-нд болох юм.