Баяр наадмын өмнөхөн Эрчим хүчний зохицуулах хорооноос айл өрхийн цахилгааны суурь төлбөрийг хоёр дахин нэмж 2000 болгосон. Тэгвэл тоолуурын заалтаар авдаг тарифыг 4.3 төгрөгөөр тус бүр нэмсэн байна.

Энгийн тоолууртай айл өрхийн 150кВт.ц хүртэлх хэрэглээний төлбөр 94.1 төгрөг байсныг 98.4, түүнээс дээш хэрэглээнээс кВт тутамд 113.9 төгрөг байсныг 118.2 төгрөг, хоёр тарифт тоолууртай айл өрхийн өдрийн хэрэглээний төлбөр 100 төгрөг байсныг 104.3, орой, шөнийн хэрэглээ 72.8 төгрөг байсныг 77.1 болгосон.

Харин аж ахуй нэгжийн хэрэглээг энгийн тоолууртай бол 124.2 төгрөг байсныг 128.5, гурван тарифт тоолуурын хэрэглээний тарифыг ч мөн тус бүрт нь 4.3 төгрөгөөр нэмжээ. Мөн уул уурхайн олборлох, боловсруулах аж үйлдвэрийн энгийн тоолуурын тариф 151.6 төгрөг байсныг 155.9 болгожээ.

Нэмэгдсэн үнийн тариф энэ сарын 25-наас үйлчилж эхлэх юм. Үнийн тариф нэмэгдсэн шалтгааныг ОХУ-аас манайд нийлүүлж буй импортын цахилгааны үнээ энэ сарын 1-нээс өсгөсөн гэж байна.