Шинэ он гарч, шинэ анхны тоотой бид танилцах цаг ирэв. Миссури муж дахь супер компьютер дэлхийн хамгийн олон оронтой анхны тоо болох 2^74,207,281– 1 буюу 22 сая оронтой тоог илрүүлжээ.

22 сая орон гэдэг нь 2013 оны нэгдүгээр сард илрүүлж байсан анхны тооноос даруй таван саяар илүү оронтой аж.

Харин түүний дараагийн зорилго нь 150,000 ам. долларын шагнал бүхий 100 сая оронтой анхны тоог илрүүлэх гэнэ

Анхны тоо гэдэг нь зөвхөн өөртөө болон нэгт хуваагдах тоонууд бөгөөд жишээлбэл 2, 3, 5, 7, 11, 13 зэрэг тоонууд юм. Хамгийн олон оронтой анхны тоог олно гэдэг аливаа компьютерын хүчин чадлыг тодорхойлох ач холбогдолтой математикийн бодлого аж.

Учир нь тухайн тоог яг бодит амьдрал дээр ашиглах ямар ч шаардлага үгүй. Шинэ амжилт тогтоосон 22 сая оронтой анхны тоог “Интернетээр Мерсенний анхны тоог хайж олох” төслийн хүрээнд олжээ.

Энэ төслийн хүрээнд дэлхий даяар олон мянган компьютерыг хооронд нь холбож анхны тоог олох ажил хийдэг бөгөөд 20 гаруй жилийн түүхтэй энэ төслийн ачаар маш олон оронтой 15 Мерсенний анхны тоог илрүүлж байсан юм байна.

Миссури мужийн их сургуулийн профессор Куртис Күпэр сургуулийнхаа хэд хэдэн компьютер дээр дээрх төслийг хэрэгжүүлж байсан бөгөөд компьютеруудын аль нэг нь өнгөрсөн есдүгээр сард 22 сая орон бүхий анхны тоог олжээ.

Гэвч өнөөдрийг хүртэл буюу урсгал засвар хийх хүртэл тэр тоог илрүүлсэн талаар хэн ч мэдээгүй аж. Доктор Күпэрийн хувьд дөрвөн ч удаа маш олон оронтой анхны тоо илрүүлж байсан бөгөөд 2013 оны дээд амжилт эвдсэн тоог ч энэ л эрхэм олж байсан юм байна.

Энэ удаагийн анхны тооны ачаар “Интернетээр Мерсенний анхны тоог хайж олох” төслийн 3000 ам. долларын шагналыг ноён Күпэр хүртэхээр болжээ. Харин түүний дараагийн зорилго нь “Electronic Frontier” сангаас амласан 150,000 ам. долларын шагнал бүхий 100 сая оронтой анхны тоог илрүүлэх гэнэ.

Эх сурвалж: TheGuardian