Европын Төв банк өнгөрсөн долоо хоногт 9.7 тэрбум евротой тэнцэх хэмжээний Засгийн газрын бонд худалдаж авснаа мэдээллээ.

Тус банк эдийн засгаа дэмжихийн тулд гуравдугаар сарын 9-нөөс эхлэн 1.1 их наяд еврогийн бонд худалдан авах хөтөлбөрөө хэрэгжүүлж эхэлсэн юм. Тиймээс эдийн засгийг дэмжих Марио Драгийн зорилтод хүрэхийн тулд энэ сард нийт 60 тэрбум еврог худалдан авах шаардлагатай байгаа аж.

Тухайлбал бонд худалдан авалтын томоохон хэсгийг хариуцаж байгаа Германы Төв банк хөтөлбөр хэрэгжиж эхэлснээс хойш гурван өдрийн хугацаанд 2.1 тэрбум еврогийн бонд худалдаж авснаа мэдээлжээ.

Одоогоор бонд худалдан авалт болон эргэн төлөлтийн хугацааны талаар тодорхой мэдээлэл гараагүй байгаа юм. Гэхдээ өнгөрсөн долоо хоногийн худалдан авалтаас харахад бондын эргэн төлөлтийн дундаж хугацаа есөн жил байгаа гэж Европын Төв банкнаас мэдээллээ.