Бидний ирээдүй болсон бяцхан хүүхэд багачуудын тоглож наадах, тав тухтай орчинд өсөж хүмүүжих таатай орчныг бүрдүүлэхээр Баянзүрх дүүргээс цэцэрлэгүүдийнхээ гадна тохижилт, хүүхдийн тоглоомын талбайг орчин үеийн стандартанд нийцсэн жишгээр тохижуулж байна.

Энэ ажлын эхлэл болгож өчигдөр тус дүүргийн 115 дугаар цэцэрлэгийн тохижилтын нээлт өчигдөр боллоо. Баянзүрх дүүргийн Засаг дарга Б.Батзоригийн санаачлагаар өнгөрсөн жил төрийн өмчийн цэцэрлэгүүдийнхээ дунд болзолт уралдаан зарлаж хамгийн шилдэг тохижилттой хүүхдийн тоглоомын талбайг шалгаруулжээ. Шалгарсан хамгийн шилдэг төслийг дүүргээс санхүүжүүлэн тохижуулж өгөхөөр амлаж байсан нь өчигдөр биелэлээ олж дүүргийн удирдлагууд хүүхдүүдээ шинэ тоглоомын талбайгаар бэлэг барьлаа.

Тоглоомын талбайг байгуулахад 68,5 сая төгрөгийн санхүүжилт хийсэн байна. Мод бут, засмал зам, сагс болон хөл бөмбөгийн талбай, гэрэлтүүлэг, хөгжөөнт тоглоом, хиймэл зүлэг зэргийг хийсэн байна.  

Тус цэцэрлэгт 5, 22 дугаар хорооны 2-5 насны хүүхдүүд хүмүүждэг аж. Нийт 6 бүлэг 270 гаруй хүүхдийн хүчин чадалтай тус цэцэрлэг 1987 онд байгуулагдсан цагаасаа хойш анх удаа хүүхдүүдэд зориулсан хөрөнгө оруулалт хийгдэж байгаа тухай цэцэрлэгийн эрхлэгч Б.Гэрэлцэцэг дурдлаа.

Гүйцэтгэгчээр Баянзүрх тохижилт ХХК ажилласан байна. Мөн тоглоомын талбайн эргэн тойронд хашаа хайсыг шинэчлэн монос, үхрийн нүдний модны суулгацыг тарьсан нь хүүхдийн хоол тэжээлд амин дэмийг нэмэгдүүлэхэд чухал ач холбогдолтой ажил болжээ.

М.Жаргал