Нэгдүгээр төрөх эмнэлэгт амаржсан эхээс коронавирус илэрсэн тул түүнийг өчигдөр орой цагт  ХӨСҮТ рүү шилжүүлсэн. Хүйтэнд гэрийн шаахай, халаттай нь, ам хамрыг нь дэрээр халхлан машинд суулгаж буй дүрс цахимд тархаж, иргэдийг ихээхэн бухимдуулав.

Иймд өнөө өглөө "Үнэн ба зөв" намын дарга А.Отгонбаатар Сүхбаатарын талбайд гэрийн халат, шаахайтай жагсаж эсэргүүцлээ илэрхийлсэн юм. Мөн ХҮН, АН-аас УОК-ын дарга Я.Содбаатар, Эрүүл мэндийн сайд Т.Мөнхсайхан нарыг огцруулах шаардлагыг Ерөнхий сайдад хүргүүлээд байна.  

Цугласан иргэд "УОК огцор" гэсэн бичиг барьцгаасан байв. Цагдаа нар иргэдийн барьсан уриа лоозонг урж, “Та нарын зорилгыг мэдэж байна” гэсэн нь маргаан дэгдээв.

Энхсаран сувилалд өнгөрсөн арваннэгдүгээр сард халдвар анх тархсан, 22-ын товчоонд нэг иргэн нас барсан, гадаад дахь Монголчууд хилийн цаана гацсан зэрэгт иргэд УОК-ыг буруутгаж, одоо хариуцлага хүлээх цаг болсон гэв.

Сүхбаатарын талбай дээр жагсаж буй иргэд "Энэ жагсаал зөвхөн өчигдрийн хэргээс болоогүй. Бид удаан хүлээлээ. Бид цаашид юу болохыг тодорхой мэдэхгүй байгаа ч одоогоор ард түмнийхээ төлөө юу ч хийхгүй байна. Ажлаа хийж чадахгүй байгаа бол зайгаа тавьж өгөх цаг нь болсон. Дараагийн удаа ард түмнээсээ чадварлаг хүмүүсийг сонгоосой. УОК-ын маш олон шийдвэр судалгаагүй байсан тул бид огцрохыг шаардсан"  хэмээв.

ЭМ-ийн сайд Т.Мөнхсайхан, УОК-ын дарга Я.Содбаатар нар үүрэгт ажлаасаа чөлөөлөгдөх хүсэлтээ илэрхийлсний дараа иргэд талбайг орхиж эхэллээ.

Иргэд "Хэрэв бүх шийдвэр анхнаасаа ил байсан бол ард түмэн тайван байх байсан. Ард түмнийг хооронд нь хагаралдуулаад өөрсдөө зүгээр байгаад дургүйцэж байна. Удахгүй талбай дээр олон хүн цугларснаас коронавирус тархсан гэх мэдээлэл явах байх. Яагаад эмэгтэй гишүүд нь чимээгүй суугаад байгаа юм бэ? Хүний эрхийн комисс нь юу хийж байна? " гэв.