Ази, Номхон далайн орнуудын дунд жил бүр зохиогддог Predator League цахим спортын тэмцээний Монгол дахь шалгаруулалт 2022 оны 8-р сарын 25-26-ны өдрүүдэд амжилттай болж өндөрлөлөө. Тус тэмцээнд нийт 32 баг Dota 2 төрлөөр, онлайнаар өрсөлдөн финалын 4 багийг шалгаруулж тоглосноор тэмцээний цорын ганц ялагчаар Team Lilgun баг тодорч, 4,000 долларын мөнгөн шагнал болон Predator League 2022 Ази Номхон далайн орнуудын аварга шалгаруулах тэмцээнд Монгол улсаа төлөөлөн оролцох эрхээр шагнууллаа. Тэмцээнд оролцох бүх зардлыг Acer бренд бүрэн хариуцаж байна.

Тэмцээний 2-р байрт Team Gamblers шалгарч 2,000 доллар, 3-р байрт Team Renewal шалгарч 1,000 долларын мөнгөн шагналыг авлаа.

Predator League 2022 гранд финалын тэмцээн  2022 оны 11 сард Япон улсын Токио хотноо зохион байгуулагдах ба Тайвань, Солонгос, Малайз, Тайланд, Филиппин, Индонез, Вьетнам, Япон, Сингапур, Австрали, Энэтхэг, Макао, Хонконг, Мьянмар, Монгол болон Шри-Ланка гэсэн Азийн шилдэг багууд Dota2 болон PUBG төрлөөр оролцож, 400,000$-ийн шагналын сангийн төлөө өрсөлдөх юм.

2018 оноос хойш жил бүр зохион байгуулагдаж байгаа Predator League Grand Final тэмцээн Индонез, Тайланд улсуудад LAN хэлбэрээр зохион байгуулагдаж байсан ба сүүлийн гурван жил цар тахлын онцгой байдлын улмаас онлайнаар явагдаж байсан юм.

Predator League Mongolia 2019 тэмцээний ялагчаар Team YG баг шалгарч, Таиландын Бангкок хотноо болсон Ази Номхон далайн орнуудын аварга шалгаруулах Гранд финал тэмцээнд амжилттай оролцоод ирсэн билээ.

Predator League Mongolia 2020 тэмцээний ялагчаар Team IMG баг шалгарч, онлайнаар Grand Final тэмцээний Dota 2 Asia бүсийн тоглолтод 2-р байрт шалгарсан амжилт үзүүлсэн.

Acer брэндийн тухай

1976 онд байгуулагдсан Acer бренд амьдралын чанарыг сайжруулахад туслах компьютер тоног төхөөрөмж, программ хангамж болон түүнтэй холбоотой үйлчилгээнүүдийг олон жилийн судалгаа шинжилгээнд үндэслэн бүтээж, хэрэглэгчдэдээ хүргэдэг юм. Компьютер, дэлгэц, проектор, сервер, таблет, ухаалаг утас болон ухаалаг төхөөрөмжүүдийг үйлдвэрлэдэг ба тэдгээртэй холбоотой үүлэн технологид суурилсан шийдлүүдийг мөн хүргэдэг.

2016 онд Acer бренд 40 жилийн ойгоо тэмдэглэсэн бөгөөд компьютерын зах зээлд тэргүүлэгчдийн нэг болсон тус компанид дэлхийн 160 оронд 7000 гаруй чадварлаг ажилтнууд ажилладаг билээ. Acer компанийн тухай дэлгэрэнгүй мэдээлэл авахыг хүсвэл www.acer.com вэбсайтад хандана уу.