"Британийн авьяастнууд" шоугаар нэрд гарсан Шотландын гэрийн авгай Сьюзан Бойлын анхны бие даасан цомог нь худалдаанд гарахаасаа өмнө Amazon.com интернэт худалдааны борлуулалтыг тэргүүлж эхэлжээ.

Бойлын арваннэгдгээр сарын 24-нд худалдаанд гарах ёстой "I Dream a Dream" цомгийг худалдан авах захиалга маш олон ирж байгаа нь ийнхүү уг сайтын "хөгжим" хэсгийн борлуулалтыг тэргүүлэхэд хүргэсэн байна. Хоёрдугаар байрт өнгөрсөн сарын 31 -нээс худалдаанд гарсан сүүлчийн зургаан жилд анх удаа алдарт Уитни Хьюстоны "I Look To You" цомог оржээ. Харин гураваас тавдугаар байрт энэ сарын 9-нд худалдаанд гарах домогт "Битлз" хамтлагийн цуврал цомог жагсч байна.

Бойлын цомгоо нэрлэсэн "I Dream a Dream" дуугаа "Британийн авьяастнууд" шоуны эхний тойрогт дуулсан бөгөөд энэ бичлэг нь "YouTube''-ийн хит болж байсан. Бойлыг энэ шоунд түрүүлнэ гэж олон хүмүүс таамаглаж байсан ч гудамжны бүжигчдийн "Diversity" хамтлагийн дараа хоёрт орсон юм. Энэ ялагдлынхаа дараа тэрбээр сэтгэлийн хямралд орж, нэлээд хэд хоног эмнэлэгт хэвтсэн боловч сэргэж чаджээ. Ингээд долдугаар сарын эхээр анхны цомгийнхоо ажилд орсон аж.