Их хүрээ хийдийн хамба лам Б.Санждорж хэвлэлийнхэнд хандлаа. Бурхан шашинтны төв Гандантэгчинлэн хийдийн хамба лам Д.Чойжамц энэ сарын 25-ны өдөр өөрийн туслах Бүрнээгээр дамжуулан Их хүрээ хийдийн хамба лам Б.Санждоржид шашны сургууль төгсөөгүй, шашны төвөөс хөөгдсөн, хулгай хийсэн гэж гүтгэсэн аж.

Тиймээс хамба лам Б.Санждорж эдгээрт няцаалт хийж баримт дэлгэлээ. Түүний хэлж буйгаар 1991 оны лам нарын I чуулганаар хамба лам Д.Чойжамцыг сонгожээ. Уг нь дөрвөн жилд нэг удаа лам нарын чуулганаар хамба ламаа сонгох журамтай аж.

Гэтэл хамба лам Д.Чойжамц энэ суудалд шигдчихээд дүрмийг өөрчилж, хамба ламыг өөрөө сонгох болгожээ. Түүнчлэн Монголын бурхан шашинтны төв, Гандантэгчинлэн хийдэд хоёр тусдаа байсан тамгыг нэгтгэж өөрөө тамгаа барьдаг болсон нь хувийн байгууллага мэт хандаж байгаагийн нэг тод жишээ.

Тэрбээр тамга нэгтгээд зогссонгүй Улсын бүртгэлийн ерөнхий газарт 2009 оны арваннэгдүгээр сарын 17-ны өдөр Монголын бурхан шашинтны төв, Гандантэгчинлэн хийдийг хувийн өмч хэлбэрээр бүртгүүлсэн байна. Гандантэгчинлэн хийд улсад татвар төлдөггүй, санхүүгийн хөндлөнгийн хяналт байхгүй учраас хамба лам Д.Чойжамцыг байгууллагын мөнгийг хувьдаа завшдаг, сүсэгтэн олонд тариф тогтоож ном айлддаг гэдгийг ч нуусангүй ээ.

Тариф тогтоосон номоо бүрэн уншдаггүй гэдгийг ч онцолж байлаа. Их хүрээ хийдийн хамба лам Б.Санждорж холбогдох баримтуудыг сэтгүүлчдэд дэлгэлээ.

Ж.Солонго