"The Voice of Mongolia”  шоуны дөрвөн шүүгч, дасгалжуулагчийн шог зургуудыг нийгмийн сүлжээнд нийтлэгдсэн байхыг та харсан биз ээ. Энэхүү зургуудыг Монголын Урчуудын эвлэлийн гишүүн, зураач барималч Намхайдагвын Оргил бүтээжээ. 

Тэрбээр Инээдмийн баярыг тохиолдуулаад “Араншин” нэртэй үзэсгэлэндээ сүүлийн үеийн 100 гаруй бүтээлээ дэлгэн тавьсан байна.

Тухайлбал, Монгол Улсын үе үеийн  Ерөнхийлөгч, дэлхийн улс орнуудын удирдагчид, Холливүүдийн жүжигчид, урлаг соёлынхны зургийг үзэж, тэдний араншинг хэрхэн онцолж гаргасныг  харж хэсэг зуур баясаж болох нь ээ. 

Зураач Н.Оргилтой ярилцлаа.

-“Араншин” үзэсгэлэнгийн талаар танилцуулахгүй юу?
Дөрөвдүгээр сарын 1-нийг тохиолдуулаад сүүлийн үед хийсэн 100 гаруй зургаараа үзэсгэлэн гаргая гэж бодож байсан юм. Цаашлаад тэр зургуудаараа ном хийгээч гэсэн санал хүмүүс тавьсан.  Ингээд “Араншин” нэртэй Цуврал 1, 2,3 номоо гаргасан. Энэ жил анх удаа шог зураг дотор нөхөрсөг хөрөг шог анхдагч үзэсгэлэнгээ гаргасан. Урд өмнө дан хөрөг “шарж”-аар үзэсгэлэн гарч байгаагүй. Энүүгээрээ би өөрийгөө анхных гэж бодож байна. Энд байгаа зургуудын ихэнх нь гуравдугаар сард зурсан. 

Хоёрдугаарт, би зурах арга барилаа өөрчиллөө. Нүүрс, харандаа, усан будгаар зурж, таталбар, зураасан зургаар гээд аль болох олон төрлөөр зурж үзэхийг эрмэлзсэн. 

-Шог хөрөг зургийн онцлог нь юундаа байдаг вэ?
-Хүний гадна төрхийг хүн дөхүүлээд хэтрүүлээд зурж болно.  Дээр нь тэр хүний дотоод сэтгэл, араншин, зан авир, мэргэжлээ дагасан, төрөлхийн болон нуугдмал араншинг тод гаргахыг хичээсэн. Зарим зургаас сайн уншигдах байх. Сүүлийн үед араншинг тодотгосон зургийг илүү зурж байна. 

-Гэхдээ араншинг тодотгож гаргана гэдэг өөрөө их ур чадвар шаарддаг байх?
-Одоо цагт хүний араншин их тодорч гарч ирж байна. Нийгмийн тэнцвэргүй байдлаас болж хүний нуугдаж байсан, тайван байсан, хулгайч муур шиг байсан  араншин илэрдэг. 

Янз бүрийн араншинтай хүмүүс нийгэмд явж байна. Сайхан  машин уначихсан гоё залуу муухай хашгирч, хэрэлдэж байна. Хүний жинхэнэ араншин илэрч байгаа юм. Энэ шиг араншин улс төрд ч байна, дунд, доод давхарт ч байна. 

-Таны үзэсгэлэнд улс төр, урлаг соёлынхон түгээмэл харагдаж байна...
-Дотор нь урлагийнхан, төрийн албан тушаалтнууд, спортынхон, Холливүдийн жүжигчид байна. Урлагийнхан нээлттэй хүмүүс учраас бүтээл талаасаа араншин нь их гоё гарч өгдөг. 

-Өөрийнхөө зургийг харсан хүмүүс хэрхэн хүлээж авдаг вэ?
-Би энэ хүмүүсийг доромжлоогүй.  Нөхөрсөг  шог зураг бол бие даасан урлаг юм. Урлагаар дамжиж энэ хүн өөрийн дотоод чанарыг танина. Сайн, муу аль алийг нь. Байгалиас заяасан төрх, гадаад донжийг хараад хэтрүүлэх юм бол миний энэ нь илүү юм байна гэдгийг олж авна. 

Эмэгтэй хүний аль болох гоё өгөгдөл, донж маягийг гаргахыг хичээдэг. Ямар ч эмэгтэй  хүнд гоё шинж байдаг. Тэрийг л олж чадвал зураач хүний авьяас юм.

-Үзэсгэлэнд гарсан хүмүүсээс хэнийх нь араншинг тодруулах хэцүү байв? 
-Хэцүү гэх юм байгаагүй. Гэхдээ тухайн хүний албан тушаал, нэр хүндийг нь бодоод зөөлрүүлж аргадаж зурсан тал бий. Донжийг нь олж  авах нь л чухал. 

-Та өөрийгөө зурж байсан уу? 

-Зурсан. Гуравхан зураасаар  зурчихсан. Өөрийгөө сайн мэдэхгүй бол бусдыг яаж зурах вэ...

-Шог зураг манайд хэр хөгжиж байна вэ?
-Нэг хэсэг “Матар”, “Тоншуул” сэтгүүлүүд дээр гарч байсан. Тухайн үед хөрөг гэхээс илүү нийгмийн асуудлыг хөндсөн зургууд нийтлэгдэж байлаа. Одоо шог зураач С.Цогтбаяр үүнийг сэргээж байна.

Би хүүхэд байхын л сараачдаг байсан. Тухайн үед сонингуудын захиалгаар их зурдаг байлаа. Сонинд голцуу улс төрийн шог зураг зурж ирсэн. Тэр үеэс хойш тасралтгүй зурсан даа. 2006 оноос хойш эрчимтэй зурж, тухайн үед анхны нөхөрсөг шог зургийн номоо гаргаж байлаа.

-Танд баярлалаа. Амжилт хүсье.

"Best art" галерейд /Сүхбаатарын талбайн урд Урчуудын эвлэлийн байр/ гарсан уг үзэсгэлэнг дөрөвдүгээр сарын 1-нд нээсэн бөгөөд гурав хоног үргэлжилжээ. 

Гэрэл зургийг: Д.Жавхлантөгс