Монгол Улсад орчин цагийн дипломат алба үүссэний 100 жилийн ойд зориулсан Чин ван Ханддоржийн нэрэмжит "Монгол туургатан-2011" олон улсын шатрын тэмцээн өчигдөр өндөрлөв.

Олон улсын шатрын холбооны ивээл дор зохиогдсон энэ тэмцээний "А" зэрэглэлд Монгол, ОХУ, Турк, Казахстаны арван шилдэг шатарчин тойргоор өрсөлдсөн юм. Энэ тэмцээний онцлог нь "А" зэрэглэлийн статустайгаас гадна их мастер, олон улсын мастер цол олгох эрхтэй байв. "А" зэрэглэлд арван шилдэг мастер өрсөлдсөний зургаа нь Монголынх байлаа.

Тэдний дөрөв нь их мастер, хоёр нь олон улсын мастер юм. Тэмцээний тавдугаар тойргийн дараагаас манай гурван шатарчин их мастер Д.Шаравдорж, ОУМ Б.Гүндаваа, Ц.Батчулуун нар хошуучилж эхэлсэн.

Б.Гүндаваа, Ц.Батчулуун нар энэ үед үлдсэн дөрвөн өргөөс гурван хожил авахад олон улсын их мастерын нэг балл биелүүлэхээр байсан юм.

Өчигдөр тэмцээн дуусахад ОУМ Ц.Батчулуун арван шилдгийг тэргүүлж долоон оноотойгоор их мастерын болзол хангалаа.

Харин ОУМ Б.Гүндаваа хоёрдугаар байранд орж их мастерын нэг балл биелүүлсэн байна. Шилдэг арван мастерын хамгийн өндөр чансаатай шатарчин ОХУ-ын тамирчин, их мастер Антон Шомоев гуравдугаар байр эзэлсэн байна.

Ингэснээр манай улс шатрын таван их мастертай боллоо.

Д.Цэрэн