Монголын Хөрөнгийн биржийн I ангилалд бүртгэлтэй компаниудын кодексийн хэрэгжилтийн давтан үнэлгээ 23.8 хувиар, II ангилалд бүртгэлтэй компаниудынх 20.7, III ангиллынх 1.0 хувиар өсжээ.

Монголын Хөрөнгийн биржид бүртгэлтэй 104 хувьцаат компанийн кодексийн хэрэгжилтийн үнэлгээ 2023 оны эцсийн байдлаар 17.1 хувиар өссөнийг Санхүүгийн зохицуулах хороо мэдээллээ. Монголын Хөрөнгийн биржид бүртгэлтэй хувьцаат компаниудад анхны үнэлгээг хийж, тайлангийн хариугаар хугацаатай үүрэг бүхий албан тоот хүргүүлснээр 56 компанийн давтан зайны үнэлгээг кодексийн хавсралт болох асуулгын маягтын дагуу гүйцэтгэж, оноогоор үнэлжээ.

Кодексийн хэрэгжилтийн давтан үнэлгээгээр 56 хувьцаат компанийн “Компанийн засаглалын кодекс”-ийн хэрэгжилтийн үнэлгээ дунджаар 15.2 хувиар өссөн байна.

Монголын Хөрөнгийн биржийн I ангилалд бүртгэлтэй 25 компанийн үзүүлэлт 23.8 хувиар өссөн нь бусад ангилалтай харьцуулахад өндөр дүнгээр өссөн үзүүлэлт болжээ. Харин II ангилалд бүртгэлтэй 20 компанийн кодексийн хэрэгжилтийн давтан үнэлгээ 20.7 хувиар,  III ангилалд бүртгэлтэй 11 компанийн давтан үнэлгээ 1.0 хувиар өссөн үзүүлэлттэй байна.

Зах зээлийн үнэлгээний хувьд 100 тэрбум төгрөгөөс дээш үнэлгээтэй компаниудын үнэлгээ 87.9 хувиар өссөн буюу өндөр дүнгээр өссөнийг онцолж болохоор байна.

Хамгийн сул хэрэгжсэн компанийн засаглалын үзүүлэлтэд I ангилалд бүртгэлтэй компаниудын хөрөнгө оруулагчтай харилцах хөтөлбөр, гүйцэтгэх удирдлагын үндсэн цалин, шагнал урамшууллыг олгох гүйцэтгэлийн шалгуур сул байна.

II, III ангиллын компаниудад цахим хуудасны шинэчлэлт, ТУЗ-ийн гишүүдэд зориулсан чиглүүлэх болон чадваржуулах сургалт, гүйцэтгэх удирдлагын үндсэн цалин, шагнал урамшууллыг олгох гүйцэтгэлийн шалгуур сул байна гэж дүгнэжээ.

Харин гурван ангилал тус бүрд ТУЗ-ийн дэргэдэх хороодын бодлого, журмын зохицуулалт сайн хэрэгжилттэй гэж үнэлэгдсэн. Түүнчлэн I болон II ангилалд бүртгэлтэй компаниудад “шүгэл үлээгч”-ийн тогтолцоо болон авлига, албан тушаалын гэмт хэргээс ангид байх зохицуулалтууд нь сайн хэрэгжилттэй байгаа аж.

О.Нарантуяа