Үлгэрт гардаг ганц эвэрт гэдэг амьтныг бид үргэлж л хун цагаан өнгөтэй, гуа сайхан биетэй мориор төсөөлдөг. Харин цоо шинэ судалгааны үр дүнд “Сибирийн ганц эвэрт” хэмээх энэ амьтан бидний таамаглаж байснаас ч сүүлд дэлхий дээр амьдарч байсан болохыг олж илрүүлжээ.

    Байгаль орчны өөрчлөлт аливаа төрөл зүйлийн амьтан, ургамалд хэрхэн нөлөөлж байсныг судалж мэдсэнээр бид ойрын ирээдүйд болох үйл явдлыг таамаглах нөхцөл бүрдэнэ

Хамгийн харамсалтай нь энэ амьтан та бидний төсөөлдөг морь шиг биш харин илүү үсэрхэг, ер нь бол хирстэй төстэй амьтан байсан аж. Гэхдээ аварга том ганцхан ширхэг эвэртэй.

Эрдэмтдийн таамаглаж байснаар “жинхэнэ ганц эвэрт” одоогоос 350,000 жилийн тэртээ мөхсөн гэж үздэг байв. Харин Казахстанаас олдсон, тун сайн хадгалагдсан чулуужсан ясны шинжилгээ энэ тоог буруу гэж заажээ.

Америкийн шинжлэх ухааны сэтгүүлийн энэ сарын дугаарт гарсан нийтлэлд бичсэнээр ганц эвэрт ердөө 29,000 жилийн өмнө дэлхий дээр алхаж явсан байна.

Гэтэл яаж ийм удаан хугацаанд устаж, мөхөлгүй оршсоор байсан нь тун хачирхалтай. Судалгааны тайланг бичсэн, Томскийн их сургуулийн эрдэмтэн Андрей Шпански “Энэ олдворын хувьд бусад олдворуудтай харьцуулахад цаг хугацааны асар их зөрүү гарч байна. Тэгэхээр тухайн амьтны амьдарч байсан орчин нөхцөл ямар нөлөө үзүүлж байсныг судалж мэдсэнээр, илүү ойлгомжтой болох байх” гэжээ.

Дэлхийн дулаарлын асуудал улам хурцдаж буй энэ үед байгаль орчны өөрчлөлт аливаа төрөл зүйлийн амьтан, ургамалд хэрхэн нөлөөлж байсныг судалж мэдсэнээр бид ойрын ирээдүйд болох үйл явдлыг таамаглах нөхцөл бүрдэх юм.

Эх сурвалж: CNN