Г.Занданшатарын Засгийн газрын гишүүдийн нэрс эхнээсээ албан бусаар тодорсоор байна. Өнөө өглөө болсон МАН-ын УЗ-ийн хурлаар Н.Учралыг дараагийн Засгийн газарт багтах ёстой гэж үзжээ. Тэрээр Эдийн засгийн хөгжлийн яамыг удирдана.      
Гэхдээ УИХ-ын чуулганы нэгдсэн хуралдаанаар шинэ сайд нарыг албан ёсоор томилно. 

ЗГХЭГ-ын даргын үүрэг гүйцэтгэгч Н.Учрал дараагийн Засгийн газарт ажиллахаар болов. Түүнээс сэтгүүлчид шинэ ажлаа хүлээн аваад, хамгийн түрүүнд анхаарах асуудлыг нь асуухад тэрээр "МАН-ын Удирдах зөвлө итгэл хүлээлгэлээ. Засгийн газрын дөрвөн жилийн үйл ажиллагааны хөтөлбөрийг УИХ-аар батлуулсан. Би энэ хөтөлбөрийг боловсруулахад хамтран ажилласан. Иймээс надад шинэ ажил биш. Энд туссан 14 мега төслийн эхнийхийг би "гал авч" хариуцан ажилласан.

Мега төслүүдийн эрх ашгийг эрэмбэлнэ. Л.Оюун-Эрдэнийн Засгийн газрын ололт амжилтыг бататгана. Ажлын залгамж чанарыг хадгална. 

Улс төрийн эрх чөлөө эдийн засгийн эрх чөлөөгөөр баталгааждаг гэдэгт би итгэдэг. Төрийн өмчит компанийн ил тод байдлыг сайжруулах хуулийн төслөө УИХ-д өгөн барьчихсан байгаа. Төрийн өмчит компаниудыг татан буулгах, нэгтгэх, нийлүүлэх, санхүүгийн зах зээлийг дэмжих, эдийн засгийг төрөлжүүлэх бодлогоо үргэлжлүүлнэ.         
  
Ган хайлуулах цогцолбор, гангийн үйлдвэр, алт цэвэршүүлэх гэх мэт боловсруулах үйлдвэрүүд их чухал. Манай эдийн засаг уул уурхайгаас хамааралтай. Хэмнэлтийн горимд шилжлээ. 

Ерөнхий сайд Г.Занданшатар "Хүний хөгжил манай мега төслүүдийн нэг" гэв. Хүнээ хөгжүүлье гэвэл эдийн засгаа тэлэх ёстой. Би Цахим хөгжлийн сайдаар ажиллахдаа төрийн 1400 үйлчилгээг иргэдэд ойртуулсан. Эдгээрийг урагшлуулахын тулд салбар дундын уялдааг хангана. Одоо бидэнд туршлага судлах, ажилтайгаа танилцах цаг байхгүй гэв.