Засгийн газрын хуралдаанаар хэлэлцээд энэ жилийн Монголын Эдийн Засгийн Форумыг зогсоосон талаар Эдийн засаг, хөгжлийн Дэд сайд С.Даваасүрэн танилцуулав. 

Тодруулбал Монгол Улсын Засгийн газраас "Монголын Эдийн Засгийн Форум-2026" арга хэмжээг зургаадугаар сарын 29, 30-ны өдрүүдэд зохион байгуулахаар төлөвлөөд байсан. 

Гэсэн ч Ойрх Дорнодод үүссэн эдийн засгийн хурцадмал байдал, үүнээс улбаалан Монгол Улсын макро эдийн засгийн тогтвортой байдалд шууд болон шууд бусаар сөргөөр нөлөөлөх эрсдэл үүсээд байна. 

Иймд Ерөнхий сайдын албан даалгавраар төсвийн сахилга батыг чангатгах, хэмнэлтийн горимд шилжих, эдийн засгийн аюулгүй байдлыг хангах чиглэлээр үүрэг даалгавруудыг төрийн захиргааны байгууллагуудад өгсөн. 

Энэ журмын дагуу "Монголын Эдийн Засгийн Форум-2026" арга хэмжээг цуцалж, тааламжтай үед зохион байгуулах нь зүйтэй гэсэн шийдвэрт хүрчээ.