Хэдэн жилийн өмнө Холливудын нэрт жүжигчин Ewan McGregor /Эвин/ Монгол охин үрчилж авсан талаар хэвлэл мэдээллийн хэрэгслээр хэсэгтээ л цацагдсан. Зөвхөн Монголд төдийгүй Холливуд ч энэ талаар шүүрэн авч багагүй шуугисан билээ. Юун түрүүнд дэлхийн нэртэй од ямар учраас Монгол охин өргөж авсан талаар эргэн нэг сануулъя.

Шотландаас гаралтай Английн нэрт жүжигчнийг Монголчууд "Оддын дайн" киногоор нь илүү сайн танина. 2004 онд дэлхийг тойрсон баримтат кино хийх үеэрээ Монголоор дайрч гарсан нэрт жүжигчин хүүхдийн халамжийн төвөөр ороход Жамъянцэцэг хэмээх хоёр настай охин нүдэнд нь тусчээ. Гэвч охиныг тэр дор нь өргөж аваагүй юм.

Харин өөрийн төлөөлөгчөө Монголд үлдээж охиныг үрчилж авах бүхий л зүйлийг хийлгүүлсэн байна. Энэ хооронд Эван охинд хэрэгтэй хувцас, витамин, тоглоом гээд хэрэгтэй бүхнээр нь хангадаг байж. Хоёр жилийн дараа охиныг өргөж авах эрх нь нээгдэж дөрвөн настай Жамъянцэцэг охин нэр алдартай ааваа дагаад Холливудыг зорьсон юм.

Холливудын хэрэгт дуртай папарациуд ч Жамъянцэцэг охины зургийг авах гэж улайрч байсан гэдэг. Харин Эван өөрийн гэр бүл болон гурван охиноо хэвлэлийнхнээс маш их нууцалдаг. Бүр гэр бүлээ өмөөрөн тэдэнтэй шүүхдэлцэж байсан удаатай. Нэрт жүжигчний эхнэрийг Иви Мавракис гэдэг бөгөөд тэд Жамъянцэцэгээс гадна хоёр охинтой.

Тэдний том охин Глара 1996 онд төрсөн бол дараагийн охин болох Истэр нь Жамъянцэцэгтэй нэг оных буюу 2001 оны зун төрсөн. Тэд Жамъянцэцэгийг Жэмиан гэж дууддаг аж. Хүүхэд асрах төвд халамжлуулж байсан Жамъянцэцэг охин нэрт жүжигчний гэр бүлд өргөгдөн Холливудыг зорихдоо дөрвөн настай байсан бөгөөд энэ жил тэрээр арав хүрч байна.

Т.Дөлгөөн