Францын контемпрари уран бүтээлч Майкл Обреновичийн бүтээсэн “Монголын гарц” урлагийн төслийн прототипийг өнөөдрөөс ирэх сарын 10-ны хооронд MN17 Арт галерейн “MN Дүрслэх урлагийн бүтээлийн үзэсгэлэн худалдаа”-гаар дэлгэх гэж байна.

“Монголын гарц” урлагийн төсөл нь Обреновичийн 2016 онд бүтээсэн дэлхийн хэмжээний “Дэлхийн гарц" урлаг, соёлын өвийн төслийн нэг хэсэг юм. Энэхүү төслийн концепц нь өөр өөр шашин шүтлэг, соёл иргэншил, улс төрийн үзэл бодолтой хүмүүсийг холбогч болох юм. Улс бүрийг төлөөлж буй гарц нь ижил хэмжээтэй, цагираган хэлбэртэй, тухайн улсын соёл, уламжлалт хэв маягийг агуулсан хээ, судалбарыг агуулдаг. Уг төсөл соёл хоорондын холбоо, эв нэгдлийг бэлэгддэг байна.

“Монголын гарц” бүтээлийг Монголын Үндэсний түүхийн музейн Эрдэм шинжилгээний төвийн дарга доктор Ж.Баярсайхантай хамтран, төрийн шагналт, урлагийн гавъяат зүтгэлтэн Д.Манибадарын бүтээл Монгол гэрийн тоононы хээнээс санаа авч бүтээжээ.

Уран бүтээлч Майкл Обренович 1979 онд Франц улсад төрсөн, бага наснаасаа урлаг, дэлхийн соёл иргэншлийн түүхийг сонирхож ирсэн. Олон улсад контемпрари уран бүтээлчээр ажилладаг, олон улсын арга хэмжээ, Франц, Макао, Индонез, Казакстан, Сингапур зэрэг дэлхийн өнцөг булан бүрт байрлах галерей, алдартай зочид буудлуудад уран бүтээлийн цуглуулгаа толилуулдаг.

Түүний уран бүтээлийн чиг хандлага нь «органик» ба «гуманист» хэлбэрээр илэрхийлэгдэх бөгөөд түүний хүсэл тэмүүлэлтэй нягт холбоотой юм. Тэрээр амьдралын утга учир, үнэмлэхүй байдлын эрэлхийлэл, хязгааргүйн талаарх үзэл бодлоо хуваалцахыг зорьдог аж.

Үзэсгэлэнд толилууж буй загварын диаметр 1 метрийн хэмжээтэй. Загвар төслийг Хөвсгөл аймгийн урч М.Энхбаярын бүтээснээр толилуулж байна. Уран бүтээлийн төслийн эх хувилбар нь 4 метрийн диаметртэй цагирган хэлбэртэй, Улаанбаатарт байршуулахаар төлөвлөжээ.

Уран бүтээлч Майкл Обреновичийн бусад бүтээл