"Грэмми"-гийн зургаан удаагийн шагналт дэлхийд алдартай дуучин Жанет Жексон 50 насандаа анхныхаа хүүг өлгийдөн авчээ. Жексоны хэвлэлийн төлөөлөгч эх хүүгийн биеийн байдал сайн байгаа талаар People сэтгүүлд  мэдээлсэн байна.

Персийн булангийн орнуудад дээд зэрэглэлийн брэндийн хувцас худалдаалдаг компанитай Катарын бизнесмэн Виссам аль Манатай Жанет Жексон гэрлэжээ. Аль Мана нь түүний гурав дахь нөхөр бөгөөд Жексоноос есөн насаар дүү юм байна. Тэд хүүгээ Эйсса гэж нэрлэжээ.

Жанет Жексон нь дэлхийд алдартай поп RnB дуучин, хөгжмийн зохиолч, жүжигчин бөгөөд 1980-аад онд урлагт хөл тавьсан билээ. Тэрбээр 2009 онд 50 насандаа хорвоог орхисон алдарт дуучин Майкл Жексоны бага дүү юм.

Жанет Жексон Оскарт нэг удаа нэр дэвшиж, Billboard сэтгүүлийн 34 шагналыг хүртсэн бөгөөд "Грэмми"-д 20 удаа нэр дэвшсэнээс зургаад нь ялалт байгуулсан гээд Америкийн дуу хөгжмийн салбараас олон шагнал хүртэж байсан уран бүтээлч билээ.

Billboard сэтгүүлд түүнийг поп хөгжмийн түүхэнд хамгийн өндөр буюу дэлхий даяар 100 сая гаруй цомог борлуулсан дуучдын нэгээр нэрлэжээ.